JOSE MOURINHO AGOMA KUJIUZULU MADRID IKILALA 3-2

MADRID, Hispania

"Sina wasiwasi kuhusu kazi yangu wakati wowote na kamwe sitojiuzulu kutokana na hili. Mimi sio mtoto mdogo. Najua kuhesabu matokeo. Kama mchezaji anaonesha hayuko tayari kuendelea kutumika, mimi lazima nioneshe utii kwa kutoendelea kumtumia"

MRENO anayeinoa Real Madrid Jose Mourinho mwishoni mwa wiki amesisitiza kutokuwa na mpango wa kujiuzulu nafasi yake katika klabu hiyo, licha ya kukubali kipigo cha mabao 3-2 kutoka kwa Malaga – kilichowaacha nyuma kwa pointi 16 dhidi ya vinara FC Barcelona.

Machungu ya kichapo hicho kwa Mourinho ulichangiwa na uamuzi wake wa kumtema kikosini nahodha na mlinda mlango wake namba moja Iker Casillas, ambaye mara kadhaa ameripotiwa kuwa na mzozo nayem huku Special One akipinga hilo.

Mourinho alionesha ukaidi wa kutojutia uamuzi wake wakati alipoulizwa kama anahisi kibarua chake kimashakani kutokana na matokeo hayo samba na uamuzi wa ‘kumkaanga’ Casillas benchi.

"Sio wakati wote, sina wasiwasi kuhusu kazi yangu wakati wowote na kamwe sitojiuzulu kutokana na hili," alisema kocha huyo mropokaji anayetaka sasa aitwe ‘The Only One badala ya Special One.’

"Mimi sio mtoto mdogo. Najua kuhesabu matokeo. Kama mchezaji anaonesha hayuko tayari kuendelea kutumika, mimi lazima nioneshe utii kwa kutoendelea kumfanya hivyo."

Hii ilikuwa ni mechi ya kwanza katika kipindi cha miaka 10 kwa mshindi huyo wa Kombe la Dunia akiwa na Hispania kutupwa benchi na mlinda mlango mwenye miaka 25, Antonio Adan alipangwa katika pambano hilo na kujikuta akimwangusha Mourinho.

"Kwa sasa, kwangu mimi na benchi zima la ufundi, Adan ni mlinda mlango bora kuliko Iker," alisema Mourinho.

"Tumekuwa tukiumiza na kutugharimu kupitia idara kadhaa za kikosi chetu, mojawapo ni ya ulinzi. Kocha anaaglia na kujikusanyia takwimu binafsi kujua nani yu bora kucheza na kisha kumpanga na ndivyo nilivyofanya.

"Nyinyi (vyombo vya habari)  mnaweza kujua nini mnahitaji lakini sio katika mambo ya kiufundi," alisema kocha huyo akionekana kufura kwa hasira.