KOCHA ENGLAND AOTA UBINGWA KOMBE LA DUNIA 2014

LONDON, England

“Haikufikiriwa kwa mfano kwamba Chelsea ingemudu kutwaa ubingwa wa Ulaya msimu uliopita, hasa baada ya kufanyika kwa mabadiliko ya dawati la ufundi katikati ya msimu, lakini wakafanya hivyo. Tena ikazichapa Barcelona na kisha Bayern Munich katika fainali”

KOCHA wa England Roy Hodgson amedai ni jambo ‘lisilowezekana’ kusema kikosi chake hakiwezi kutwaa ubingwa wa Kombe la Dunia katika fainali zijazo nchini Brazil mwaka 2014.

Bosi huyo wa ‘The Three Lions’ amesema hayo akitumia matokeo ya Chelsea kutwaa ubingwa wa Ulaya msimu uliopita baada ya kuzichapa Barcelona na baadaye Bayern Munich kwa mikwaju ya penati kwenye dimba la Allianz Arena.

Hodgson alisema: “Unaweza kusema kwamba tuko mbali mno na timu zinazopewa nafasi ya kutwaa ubingwa wa dunia, hivyo kushinda kuwa ni jambo lisilo na uwezekano wa kutokea.

“Lakini unapaswa kuachana na hisia kwamba ’haiwezekani’ hasa katika soka.

“Kuna matukio mengi mno katika soka unayoweza kuyachuklulia kama mfano hai juu ya hilo, kwamba unaweza kusema haiwezekani, lakini mwisho wa siku watu wakafanya hivyo.

“Haikufikiriwa kwa mfano kwamba Chelsea ingemudu kutwaa ubingwa wa Ulaya msimu uliopita, hasa baada ya kufanyika kwa mabadiliko ya dawati la ufundi katikati ya msimu, lakini wakafanya hivyo.

“Tena ikazichapa Barcelona na kisha Bayern Munich katika fainali, timu mbili bora kabisa katika soka la Ulaya na duniani, hivyo ningependa kuweka hai ndoto za uipa England ubingwa wa dunia.”

Hodgson alichukua mikoba ya kuinoa England akijaza nafasi ya Fabio Capello Mei mwaka huu, baada ya Mtaliano huyo kushindwa kuipa mafanikio na kuishuhudia timu yake ikiishia robo fainali ya Mataifa Ulaya ‘Euro 2012’ iliyofanyika Poland na Ukraine.