MZAZI AWAITA VIJANA KWENYE KOZI YA WAAMUZI

Na Elizabeth John

MKURUGENZI wa Ufundi Wilaya ya Temeke, Kennedy Mwaisabula ‘Mzazi’ amewataka wahitimu wa kidato cha nne kujitokeza katika kozi ya waamuzi kwa lengo la kuongeza ajira kwa vijana.

Akizungumza jijini Dar es Salaam, Mzazi alisema vijana waliomaliza kidato cha nne wanaosubili matokeo wanatakiwa wajitokeze katika wilaya ya Temeke kwaajili ya kozi hiyo ya muda wa siku saba na ada yake ni sh 45,000.

Alisema darasa litaanza baada ya wao kujitokeza hadi kufikia 25 na kwamba hiyo ni ajira kwa vijana ambapo watapata nafasi ya kufundisha ligi daraja la nne Wilaya ya Temeke.

“Tumeamua kufanya hivyo kwa kuona vijana wengi baada ya kumaliza kidato cha nne wanakuwa mtaani, naamini hii itapunguza idadi hiyo tunaomba vijana wajitokeze kwa wingi ili kuongeza idadi ya waamuzi katika soka letu,” alisema Mzazi.

Aliongeza kuwa mbali na wanafunzi waliohitimu kidato cha nne pia wanakaribishwa na vijana ambao hawana ajira ili kuwanusuru vijana wanaoingia katika makundi yasiyofaa na uvutaji bangi kwa kukosa ajira.