FERGUSON: BADO NIPO NIPO SANA OLD TRAFFORD

Sir Alex Ferguson

MANCHESTER, England

Wakati Ferguson akidaiwa kufanya vikao kadhaa na Pep Guardiola jijini New York, Marekani kwa nia ya kumkabidhi mikoba yake kiangazi kijacho, Mskochi huyo amebainisha kuwa yu tayari kufanya kazi kwa miaka miwili zaidi Old Trafford

KOCHA Sir Alex Ferguson yuko katika mchakato wa kubaki kazini Old Trafford kwa miaka miwili zaidi akiinoa klabu yake ya Manchester United.

Fergie, aliyeadhimisha miaka 71 ya kuzaliwa Siku ya Mwaka Mpya, alikuwa mwenye furaha isiyopimika akishuhudia kikosi chake kikishinda jumla ya mabao 4-0 dhidi ya Wigan, shukrani kwa mabao ya mawili mawili ya Robin van Persie na Javier Hernandez ‘Chicharito.’

Mskochi huyo amezidharau taarifa kuwa anajiandaa kuachia kijiti kwa mmoja kati ya Jose Mourinho anayeinoa Real Madrid, au kocha wa zamani wa FC Barcelona, Pep Guardiola kiangazi kijacho.

Ferguson alisema: “Nina matumaini ya kubaki kazini Old Trafford kwa kipindi kidogo kijacho. Hakuna haja ya kugeuza hilo mjadala, naweza kukuhakikishia hivyo.

“Unaweza kuzungumza kuhusu mmoja wa mameneja vijana wenye kusisimua – kuwa yeye anaweza kuja kufanya kazi hapa katika kipindi cha miaka miwili?

“Nadhani mameneja wa daraja la juu daina huwa katika mahitaji.

“Guardiola, Mourinho, David Moyes, kuna mameneja wengi tu nje ya hapa ambao wana mafanikio makubwa dimbani na mimi kamwe sijui mipango yao.

“Nani ambaye anajua wapi watakuwa makocha hao katika kipindi miaka miwili au mitatu ijayo,” alisisitiza Fergie, akiwa na furaha ya ushindi dhidi ya Wigan.

Akiuzungumzia ushindi huo, Fergie alisema: “Ulikuwa ni mwanzo mzuri wa mwaka 2013. Tuko juu kwa tofauti ya pointi saba, tukiongoza ligi, huku kukiwa kumebaki mechi 17 msimu kufikia tamati.”