MMILIKI AC MILAN AMFAGILIA KEVIN-PRINCE BOATENG

Boateng wa pili kulia akiwa na Mathiue Flamini wakiondoka dimbani baada ya kubaguliwa na mashabiki, huku wakiombwa kutofanya hivyo na wachezaji wa Pro Patria.

MILAN, Italia 

"Nilimuita kidogo Kevin-Prince Boateng wakati akiondoka dimbani na nikampongeza sana kwa majibu yake dhidi ya ubaguzi wa rangi ambayo ni fedheha iliyochukua nafasi huko Busto Arsizio. Nina furaha sana kwa aina hii ya majibu iliyotoa Milan kwa wabaguzi"

MMILIKI wa AC Milan, Silvio Berlusconi – ambaye pia ni Waziri Mkuu wa zamani wa Italia, alimsifia Kevin-Prince Boateng kwa msimamo alioonesha wa kuongoza wenzake kususia mechi kama ishara ya kukerwa vitendo vya ubaguzi wa rangi.

Boateng aliongoza wachezaji wa Milan ‘Rosonerri’ kuondoka uwanjani na kuvunja pambano, baada ya kufanyiwa ubaguzi wa rangi wakati wa mechi yao ya kirafiki na klabu ya madaraja ya chini ya Pro Patria.

Berlusconi, asisitiza kuwa klabu yake itaendelea kuchuakua uamuzi huo katika mechi zake pindi vitendo vya ubaguzi vitakapofanywa na mashabiki ama wachezaji, zikiwamo mechi za michuano ya klabu barani Ulaya.

"Nilimuita kidogo Kevin-Prince Boateng wakati akiondoka dimbani na nikampongeza sana kwa majibu yake dhidi ya ubaguzi wa rangi ambayo ni fedheha iliyochukua nafasi huko Busto Arsizio.

"Nina furaha sana kwa aina ya majibu iliyotoa Milan kutokana na kilichotokea na nina kuhakikishia mahali popote sisi tutakapofanyiwa hivyo, Milan itasusia mechi na kuondoka uwanjani."

Aidha, Boateng amesisitiza kuwa, yu tayari kususia na kuondoka dimbani tena katika mechi yoyote kama atashuhudia akifanyiwa vitendo vya ubaguzi wa rangi na mashabiki wa mchezo huo.

Akihojiwa na kituo cha televisheni cha Cable News Network (CNN),  Boateng, 25, alisema: "Sitojali kama ni mchezo wa kirafiki, Ligi Kuu na michuano mingine nchini Italia, au Ligi ya Mabingwa Ulaya – nitasusia mechi na kuondoka uwanjani tena."

Hata hivyo, Gordon Taylor, ambaye ni Mkurugenzi Mkuu wa Chama cha Wanasoka wa Kulipwa, ameonya kuwa wachezaji wanaweza kujikuta matatizoni kama watasusia mechi pindi wanapofanyiwa vitendo vya ubaguzi katika mechi nchini hapa.

"Ubaguzi wa rangi lazima uripotiwe kwa maofisa wa mchezo na wachezaji kupitia manahodha wao. Kama vitendo hivyo vitaendelea, maofisa wa mechi ndio wataamua kutoendelea na mechi," alisisitiza Taylor.

Tayari Shirikisho la Soka la Kimataifa (Fifa) na Shirikisho la Soka barani Ulaya (Uefa), bodi zenye mamlaka ya juu duniani na Ulaya zilishakataza kuhusu wachezaji kususia mechi na kuondoka dimbani pindi wanapobaguliwa.