AC MILAN, INTER MILAN ‘KIAMA’ SAN SIRO LEO

Mario Balotelli wa AC Milan akichuana na mchezaji wa Parma wakati wa mechi ya Serie A, Balotelli leo atakuwa dimbani wakati Milan itakapoumana na mahasimu wao Inter kwenye dimba la San Siro.

Hii ilikuwa mechi ya mzunguko wa kwanza wa Serie A, kati ya AC Milan na Inter Milan

MILAN, Italia

Tayari makocha wa timu hizo pinzani zinazotumia dimba moja la San Siro Massimiliano Allegri wa AC Milan na Andrea Stramaccioni wa Inter wameingia katika malumbano na tambo kuelekea mtanange huu, huku kila mmoja akikimwagia sifa kikosi chake

BAADA ya kuwaduwaza FC Barcelona ya Hispania katika mechi ya kwanza hatua ya mtoano wa 16 bora wa Ligi ya Mabingwa Ulaya, AC Milan leo inashuka tena katika dimba la nyumbani la San Siro kuwavaa mahasimu wao Inter Milan – katika pambano kali la Serie A.

Ikiongozwa na nyota wa zamani wa Inter, Mario Balotelli – ambaye hakucheza pambano Ulaya dhidi ya Barca, Milan inatarajia muendelezo wa furaha kwa mashabiki wake, huku ‘mtukutu’ huyo (Balotelli) akitazamwa kwa jicho la tatu kama anaweza kuwaua nduguze hao.

Licha ya kutarajiwa kuendeleza utikisaji nyavu alioanza nao tangu alipotua Milan akitokea Manchester City ya England, Balotelli leo anatabiriwa huenda akapata wakati mgumu dimbani, kutoka kwa mashabiki wake wa zamani ambao hawajafurahishwa na ujio wake huo.

Wiki iliyopita Inter ilipigwa faini kwa kumfanyia vitendo vya kibaguzi nyota huyo, ambaye aliingia uwanjani hapo kutazama mechi ya Inter Milan na Genoa, lakini akakumbana na kadhia hiyo baada ya kuwaudhi mashabiki kwa kuvaa jezi za Milan.

Kama ilivyo kwa Milan, Inter nao wanaingia katika pambano hili ikitoka kusonga mbele hatua ya 16 bora ya Europa League, baada ya kuichapa CFR Cluj Napoka ya Romania kwa mabao 3-0 na kuing’oa kwa jumla ya mabao 5-0 na sasa itaumana na Tottenham.

Tayari makocha wa timu hizo pinzani zinazotumia dimba moja la San Siro Massimiliano Allegri wa AC Milan na Andrea Stramaccioni wa Inter wameingia katika malumbano na tambo kuelekea mtanange huu, huku kila mmoja akikimwagia sifa kikosi chake.

Ukiondoa pambano hilo, Sampdoria itasshuka dimba la nyumbani kuwavaa Chievo, huku Atalanta ikitaraji kupimana ubavu na AS Roma.

Bologna itakuwa na kibarua kipevu mbele ya Fiorentina, Cagliari ikikabiliana na Torino, Juventus ikiwavaa Siena na Parma kutunishiana misuli na Catania.

SuperSport.com