MTOANO MABINGWA ULAYA: ARSENAL VS BAYERN HAPATOSHI EMIRATES LEO

 LONDON, England

Arsene Wenger amewataka nyota wake kusahahu kilichotokea katika Kombe la FA na kuanza harakati mpya za kuweka hai matumaini ya kutwaa kombe msimu huu kwa kuwalaza Bayern – ambao msimu uliopita walifungwa fainali na Chelsea

WANAFAINALI wa msimu uliopita wa Ligi ya Mabingwa Ulaya, Bayern Munich ya Ujerumani, leo inajitupa ndani ya dimba la Emiartes jijini hapa kuwavaa wenyeji wa Uwanja huo, Arsenal katika mechi kali ya mtoano wa 16 bora wa michuano hiyo.

Arsenal, ambao wamefanikiwa kutinga hatua hii kwa mara ya 13 sasa, ina kibarua kigumu cha kupoza machungu ya mashabiki wao, wanaougulia kichapo kilichowang’oa katika michuano ya Kombe la FA ilipowaalika nyumbani Blackburn Rovers.

Kocha wa Gunners, Arsene Wenger amewataka nyota wake kusahahu kilichotokea katika Kombe la FA na kuanza harakati mpya za kuweka hai matumaini ya kutwaa kombe msimu huu kwa kuwalaza Bayern – ambao msimu uliopita walifungwa fainali na Chelsea.

“Tunapaswa kusahau kilichotokea dhidi ya Blackburn. Tugeuzie umakini wetu dhidi ya Bayern ili kuona ni kwa namna gani tunachanga vema karata kuelekea robo fainali.

“Tunacheza nyumbani na tunapaswa kuwapoza mashabiki wetu kwa kushinda,” alisema Arsene Wenger aliyesisitiza kutokuwa na mpango wa kujiuzulu licha ya kufeli kwa majaribio yake ya kutwaa taji kwa miaka minane sasa.

Aidha, mshambuliaji Lukas Poldoski, amewakumbusha nyota wenzake kuweka hofu kando na kujiamini wakati huu wanapoivaa Bayern: “Hatuna haja ya kuihofia Bayern. Ni timu nzuri yenye nyota wa kiwango cha juu, lakini tuna uwezo wa kuwafunga na kuhakikisha tunawang’oa jumla mashindanoni.”

Ukiondoa pambano la Arsenal na Bayern Munich, leo pia kutakuwa na mechi kati ya mabingwa wa michuano hii mwaka 2004, FC Porto ya Ureno itakayoshuka dimba la nyumbani la Estadio do Dragao, jijini Porto Ureno, kuwaalika Malaga ya Hispania.

Pambano hili linatarajiwa kujaa ushindani, kutokana na soka la Porto na kiwango kilichooneshwa na Malaga msimu huu, ambayo imezika jinamizi la ukata uliokuwa ukiikabili na kulazimika kuwauza nyota wake na kushangaza wengi hatua ya makundi kwa kufuzu mtoano huu.

……SuperSport.com……

......SCHWEINSTEIGER: USHINDI LAZIMA LEO

MUNICH, Ujerumani

‘Tunasema kwa Kijerumani, “Mia san mia” – ikimaanisha “Sisi ndio sisi.” Kauli hiyo haitufanyi sisi kuwa kiburi, bali utupa kujiamini na kuchagiza ushindi mchezoni. Inahusu zaidi kuongeza morali wa ushindi akilini mwetu”

KIUNGO wa kimataifa wa Ujerumani na klabu ya Bayern Munich ya hapa, Bastian Schweinsteiger, amesema kushinda pambano lao leo dhidi ya Arsenal ndio ‘mpango mzima’ na kuwa ubora wa soka la kitabuni kwao halina tija.

'Katika Bayern Munich, tunacheza ili kushinda,’ alisema Schweinsteiger akiwa buheri wa afya kwenye sofa za kitambaa chekundu zinazopamba vyumba vya kuvalia vya Uwanja wa Allianz Arena, akibainisha nia ya kuiondosha Gunners na kutinga robo fainali.

Schweinsteiger anaongeza: ‘Kuna kauli mbiu maarufu mno miongoni mwa wakazi wa hapa Bavaria na ambayo tumekuwa tukiitumia sisi ndani ya Bayern Munich.

‘Tunasema kwa Kijerumani, “Mia san mia” – ikimaanisha “Sisi ndio sisi.” Kauli hiyo haitufanyi sisi kuwa kiburi, bali utupa kujiamini na kuchagiza ushindi mchezoni. Inahusu zaidi kuongeza morali wa ushindi akilini mwetu.

‘Wakati wachezaji wanapokuja hapa kutoka sehemu nyingine, mara kadhaa wao huonesha furaha tunapomaliza mechi kwa sare ya 0-0 au 1-1, lakini sisi tuliokulia katika mazingira ya hapa, hatufurahii kitu kama hicho zaidi ya ushindi.

‘Sisi kamwe haturidhiki na matokeo ya sare ya 0-0 au 1-1. Hilo liko mawazoni mwa kila mmoja miongoni wa Wajerumani, hususani wa klabu hii ya Bayern Munich,’ alisema Schwenisteiger akionekana hatanii.

……Daily Mail…….

Mwisho

RATIBA MABINGWA ULAYA

LEO JUMANNE FEBRUARI 19

Arsenal v Bayern Munich – Emirates, saa 4:45         

FC Porto v Malaga - Estadio do Dragao, saa 4:45    

KESHO JUMATANO FEBRUARI 20

AC Milan v Barcelona - San Siro, saa 4:45   

Galatasaray v Schalke - Turk Telekom Arena, saa 4:45

           

VINARA WA MABAO MABINGWA ULAYA

Mchezaji                     Timu               Mabao

C. Ronaldo                  Real Madrid    7

B. Yilmaz                    Galatasaray     6

Oscar                           Chelsea            5

Lionel Messi                Barcelona        5

Osorio Alan                 Braga               5

Lewandowski             Dortmund       5

Willian                         Shakhtar          4

Ez. Lavezzi                 PSG                 4

Jan Huntelaar              Schalke            4

K. Mitroglou               Olympiacos     4