MADRID, BARCELONA HAKUNA MBABE KOMBE LA MFALME

MADRID, Hispania

Nusu fainali ya pili ya Kombe la Mfalme kati ya Barcelona na Madrid inatarajiwa kupigwa Nou Camp hapo Februari 27, katika mechi itakayoamua timu ya kutinga fainali baina ya miamba hiyo

MRENO Jose Mourinho bado yu kikaangoni klabuni Santiago Bernabeu, licha ya kukwepa kichapo na kuambulia sare ya bao 1-1 na FC Barcelona kwenye dimba la nyumbani katika mechi ya mahasimu ‘El Clasico’ juzi usiku.

Kocha huyo wa Real Madrid alikuwa hatarini kuangukia pua nyumbani katika nusu fainali hiyo ya kwanza ya Kombe la Mfalme ‘Copa del Rey’ dhidi ya mahasimu wao na vinara wa La Liga Barca.

Cesc Fabregas (pichani kulia) aliifungia Barca bao lake dakika tano kabla ya tamati ya kipindi cha kwanza, kabla ya yoso Raphael Varane, 19, kufunga kwa mara ya kwanza katika ‘El Clasico’ na kuisawazishia Madrid dakika saba kabla ya filimbi ya mwisho.

Mourinho kocha wa zamani wa Chelsea na Inter Milan, siku zake zinahesabika klabuni Bernabeu, akisotea pengo la pointi 15 nyuma ya mahasimu wake hao Barcelona, katika jaribio la kutetea ubingwa wake wa La Liga.

Tumaini pekee la kuambulia ubingwa msimu huu ni michuano ya Ligi ya Mabingwa Ulaya, ambako ataivaa Manchester United katika mechi mbili za nyumbani na ugenini za hatua ya 16 bora.

Mourinho na kikosi chake watawaalika Man United chini ya Sir Alex Ferguson hapo Jumatano ya Februari 13, kabla ya kurudiana kwenye nyasi za Uwanja wa Old Trafford Jumanne ya Machi 5.

Nusu fainali ya pili ya Kombe la Mfalme kati ya Barcelona na Madrid inatarajiwa kupigwa Nou Camp hapo Februari 27, katika mechi itakayoamua timu ya kutinga fainali baina ya miamba hiyo.

……BBC/The Sun……