ROONEY, MAN UNITED WAWEKA REKODI OLD TRAFFORD

Mshambuliaji Wayne Rooney akishangilia moja ya mabao yake akiwa na wachezaji wa Manchester United walipoichapa Southampron mabao 2-1 juzi usiku.

Rooney akichuana na mlinda mlango wa Southampton wakati wa mechi yao ya Ligi Kuu kwenye Uwanja wa Old Trafford.

MANCHESTER, England

Mshambuliaji huyo sasa ameandika historia mpya ya kufunga mabao 101 kwenye Uwanja wa Old Trafford akiwa na United – ambayo nayo imekuwa klabu ya kwanza kushinda mechi 300 za Ligi Kuu kwenye dimba hilo la nyumbani

MABAO mawili aliyofunga mshambuliaji Wayne Rooney katika kipindi cha kwanza cha mechi kati ya Manchester United na Southampton, licha ya kuipaisha zaidi United katika kilele cha Ligi Kuu, yameweka rekodi mbili za kuvutia kwa nyota huyo na klabu yake.

Mshambuliaji huyo sasa ameandika historia mpya ya kufunga jumla ya mabao 101 kwenye Uwanja wa Old Trafford akiwa na United – ambayo nayo imekuwa klabu ya kwanza kushinda mechi 300 za Ligi Kuu kwenye dimba la nyumbani.

Ni ushindi uliowasukuma juu kwa pointi saba zaidi, lakini bosi wa United Sir Alex Ferguson alidai: “Tulikuwa na bahati kushinda mechi hii, lakini pia kushinda ni jina la mchezo hasa katika kipindi hiki cha msimu.

“Katika uzoefu wangu wakati unapokuwa kwenye mchuano wa ubingwa kunatokea mechi ambazo unakubaliana na ukweli kuwa ulihitaji bahati kidogo kushinda – na nadhani huu ulikuwa mmoja wa usiku wa aina hiyo.”

Katika mechi nyingine za Ligi Kuu ya England zilizopigwa juzi usiku, Washika Bunduki wa jiji la London, Arsenal walitoka nyuma kwa mabao 2-0 na kumaliza pambano kwa sare ya 2-2 dhidi ya Liverpool.

Everton waliibuka na ushindi wa 2-1 dhidi ya West Brom, huku Norwich City ikitoka sare ya bao 1-1 naTottenham. Fulham wakaiduwaza West Ham kwa mabao 3-1, huku Reading ikiikaba koo Chelsea na kutoka nayo sare ya mabao 2-2.

…….The Sun……