DIAMOND, NEY WA MITEGO KUZINDUA VIDEO 'MAPENZI GANI' DAR LIVE JUMAMOSI

DAR ES SALAAM, Tanzania

"Uzinduzi huu pia utatumika kusaka muziki upi na msanii yupi mkali anayekubalika kupitia staili zao za Hip Hop na Bongo Fleva, ambapo kupitia uzinduzi wa video ya Mapenzi Gani, itadhihirishwa nani mkali kati ya wakali hao na aina ya muziki wanaouwakilisha"

UWANJA wa Taifa wa Burudani Tanzania, Dar Live, ulioko Mbagala wilayani Temeke, Jumamosi Mei 18 utakuwa kwenye hekaheka nzito, wakati wa wakali wa Bongo Flava nchini, Naseeb Abdul  'Diamond Platinamz' na Emmanuel Elibariki ‘Ney wa Mitego,’ watakapokuwa wakizindua video ya kibao chao kinachotamba kwa sasa kiitwacho Muziki gani.

Akizungumza jijini Dar es Salaam leo, Mratibu wa onesho hilo Kahabi Mwendesha alisema, maandalizi ya uzinduzi huo yamekwisha kamilika, ambapo utasindikizwa na wasanii kadhaa wa Hip Hop na Bongo Fleva, huku akiwataka mashabiki kufika kwa wingi.

Kupitia uzinduzi wa video hiyo, ulioandaliwa na Kampuni ya Yuneda Entertainment inayojihusisha na masuala ya burudani, Diamond na Ney wa Mitego watapambanishwa, kujua muziki ‘unaobamba zaidi’ kwa mashabiki kati ya Hip Hop na Bongo Fleva.

"Uzinduzi huu pia utatumika kusaka muziki upi na msanii yupi mkali anayekubali kupitia staili zao za Hip Hop na Bongo Fleva, ambapo kupitia uzinduzi wa video ya Mapenzi Gani, itadhihirishwa nani mkali kati ya wakali hao na aina ya muziki wanaouwakilisha," alisema Mwendesha.

Aliongeza kuwa, mara baada ya video hiyo kuzinduliwa kesho Mei 18, ukumbini Dar Live, maonesho ya uzinduzi huo yatahahamia katika mikoa ya Morogoro, Dodoma, Mwanza na kisha Arusha na kuwataka mashabiki wa mikoa hiyo kukaa tayari.

Viingilio kesho ni shilingi 10,000, ambapo ulinzi utaimarishwa, huku watakaohudhuria wakipata fursa ya kushuhudia mechi ya kuhitimisha msimu wa Ligi Kuu ya Vodacom kati ya mahaisimu Simba na Yanga, kupitia televisheni kubwa zilizopo ukumbini hapo.