UCHAGUZI MKUU BFT JULAI 7

Na Elizabeth John

SHIRIKISHO la ngumi za Ridhaa Tanzania (BFT) linatarajia kufanya uchaguzi wake Mkuu Julai 7 mwaka huu jijini Mwanza baada ya viongozi waliopo madarakani kumaliza muda wake.

Akizungumza jijini Dar es Salaam, Katibu Mkuu wa BFT, Makore Mashaga, alisema nafasi ambazo zitagombewa ni Rais, Makamu wa Rais, Katibu Mkuu, Mweka Hazina na nafasi tisa za  wajumbe.

Mashaga alisema fomu zilianza kutolewa Juni 4 katika Ofisi za Baraza la Michezo la Taifa (BMT)na kwamba usaili kwa wagombea wote utafanyika Julai 5 jijini Mwanza.

Alisema gharama za fomu hizo kwa wagombea ni sh. 150,000 nafasi ya Rais, sh. 100,000 kwa nafasi ya Makamu wa Rais, Katibu Mkuu na Mweka Hazina, sh. 50,000 kwa wajumbe.

Aliongeza kuwa Shirikisho linatoa wito kwa watanzania wenye uwezo wa kuongoza michezo kujitokeza kwa wingi kuchukua fomu za kugombea nafasi hizo kwa miaka mine ijayo.