WAKAZI WA SARANGA WAJITOKEZA KATIKA ZOEZI LA USAFI WA MAZINGIRA

Na Mwandishi Wetu

WAKAZI wa Kata ya Saranga wameutaka uongozi wa Halmashauri ya Wilaya Kinondoni jijini Dar es Salaam, kusambaza makasha ya kutupia taka, lengo ni kuifanya kata hiyo kuwa na mazingira bora wakati wote.

Akizungumza na wandishi wa habari jijini, Katibu wa BAVICHA, kata hiyo, Lazaro Lucas, alisema kujitokeza kwa wananchi wengi vile bila kujali itikadi ya vyama inadhihirisha kuwa wamechoshwa kuishi kwenye mazingira machafu.

Alisema kusambazwa kwa makasha mengi ya kutupia taka kutawafanya wakazi wa kata hiyo kujizuia kutupa taka hovyo kwenye mitaa.

“Leo mkusanyiko wetu huu tumeamua kufanya usafi kwenye mtaa huu wa Matangini lakini huu ni mpango endelevu, utaendelea kufanyika kwenye mitaa yote saba ya kata hii kwa ushirikiano kama huu”alisema Lucas.

Alisema utaona baadhi ya watu wamepiga pasi nguo zao vizuri lakini cha kushangaza watu hao wamezunguukwa na uchafu katika makazi na  ofisi zao kitendo kinachowashushia hadhi.

“Huwezi kuwa umenyoosha nguo zako vizuri kwa pasi lakini unaishi na uchafu itakuwa usafi wako wa nguo ni bure tu, bado utakuwa wewe ni mchafu”alisema.

Naye Diwani wa kata hiyo, Efraim Kinyafu, alisema suala la usafi na utunzaji wa mazingira ni mpango mkakati wa wilaya hiyo, ambao unamhusu kila mtu.

Alisema ni lazima kwa wakazi wa saranga na kwa ujumla kuwa wanahakikisha wanaweka kata hiyo katika mandhari safi nay a kuvutia wakati wote.