ZIARA YA OBAMA; MANISPA YA ILALA YATIMUA WAFANYABIASHARA NDOGONDOGO MITAA YA POSTA

 Askari wa Manispaa ya Ilala wakiendesha zoezi la kuondoa wafanyabiashara ndogondogo katika eneo Posta mpya jijini Dar es Salaam jana ikiwa ni operesheni ya kusafisha jiji la Dar es Salaam kabla ya ujio wa Rais wa Marekani, Barack Obama. (Picha  na Habari Mseto Blog)

Vifaa vya wafanyabiashara vikichuliwa na askari wa jiji leo. 

DAR ES SALAAM, Tanzania

HALMASHAURI ya Wilaya ya Ilala, imesema operesheni ya kuwaondoa wafanyabiashara ndogondogo kwenye maeneo ambayo si rasmi itakuwa endelevu, imewataka wanafanyabiashara hao kuondoka mara moja kinyume chake wataondaondolewa kwa nguvu.

Akizungumza na waandishi wa habari jijini Dar es Salaam leo, msemaji wa Halmashuri hiyo, Tabu Shaibu, alisema operesheni hiyo ni mkakati wa viongozi wa halmashauri hiyo katika hali ya usafi.

Alisema operesheni hiyo itaendeshwa katika kila eneo la wilaya hiyo, itawahusu wale wote wanaofanyabiashara kinyume cha sheria za halmashauri hiyo ambapo wale waliofuata utaratibu haitawagusa.

“Ujio wa Obama unaweza ukawa sababu lakini lazima tukubali kuwa katika mila zetu majumbani kwetu tumekuwa na ustarabu anapokuja mgeni huwa tunajaribu kuyaweka mazingira yetu kwenye usafi”alisema Tabu. Tabu alisema operesheni hiyo katika Mtaa wa Kivukoni iliaza jana kutokana na ukweli kwamba huko ndiko kwenye Ikulu ya Rais na viongozi wengine wa Serikali.

Kuhusu polisi kushiriki kwenye operesheni hiyo, alisema uamuzi huo ulitokana na viongozi wa Mkoa huo, hata  hivyo lengo ni kushirikisha kila mdau wa wilaya hiyo, hivyo si ajabu kuona polisi wanafanya hivyo.

Aidha, wafanyabiashara hao walitakiwa kujaribu kujiunga kwenye vikundi na kuomba maeneo ya kufanyia biashara kisheria kupitia viongozi wa Mitaa, Kata hadi kwa Mkurugezi.