BOB JUNIOR AISAMBAZA VIDEO YA 'KIMBIJI'

Na Elizabeth John

MTAYARISHAJI na msanii wa muziki wa kizazi kipya nchini, Rahim Rummy ‘Bob Junior’, ameachia video ya ngoma yake mpya inayokwenda kwa jina la ‘Kimbiji’, ambayo inafanya vizuri katika vituo mbalimbali vya redio.

Kabla kuachia kazi hiyo, Bob Junior alikuwa anatamba na kibao chake cha ‘Nichuum’ ambacho kinafanya vizuri katika vituo mbalimbali vya redio na runinga.

Akizungumzia kazi hiyo, mkali huyo alisema ameitengeneza nchini Poland, ambako alikuwa amekwenda kwa ajili ya mapumziko ya siku kadhaa.

“Namshukuru Mungu kazi hii imepokelewa vizuri na mashabiki wangu, naomba mashabiki wangu wazidi kunipa sapoti katika kazi hiyo ikiwa ni pamoja na kazi zingine zinazofuata,’ alisema.

Alisema kwa sasa yupo katika maandalizi ya kutengeneza ngoma yake mpya ambayo anatarajia kuiachia hivi karibuni ikiwa na ujumbe mzito kwa jamii, hivyo anawaomba mashabiki wake wakae mkao wa kula kwaajili ya kazi hiyo.