RITHA WA DIAMOND AONEKANA KIDEONI

Na Elizabeth John

BAADA ya kufanya vizuri na ngoma yake ya ‘Ritha’, mkali wa muziki wa kizazi kipya nchini, Naseeb Abdul ‘Diamond Platinum’, leo anatarajia kusambaza video ya ngoma hiyo katika vituo mbalimbali vya televisheni.

Akizungumza jijini Dar es Salaam juzi, Diamond alisema ameamua kusambaza video hiyo leo ili kupisha mwezi wa Ramadhani na kuwaacha mashabiki wake na burudani iliyokamilika.

“Mimi kama muislamu niliyekamilika, sina budi kufuata sheria ya dini yangu, hivyo nataka kuwaacha mashabiki wangu na burudani iliyokamilika na baada kumaliza mwezi mtukufu nakuja na kitu kipya,” alisema.

Msanii huyo ambaye kwasasa yupo katika chati ya kimataifa, aliwataka mashabiki wake kukaa mkao wa kula kwaajili ya kazi zake ambazo anatarajia kuzitoa baada ya mwezi wa Ramadhani kumalizika.

Diamond alishawahi kutamba na vibao vyake kama Ukimwona, Kesho, Nataka kulewa, Mbagara na nyinginezo ambazo zilifanya vizuri na kumtambulisha katika tasnia ya muziki huo.