ROMA AZISHUKIA REDIO ZA BONGO

Na Elizabeth John

MKALI wa muziki wa hip hop nchini, Ibrahim Mussa ‘Roma Mkatoliki’ amevilalamikia baadhi ya vyombo vya habari kwa kukataa kupiga wimbo wake mpya unaojulikana kwa jina la ‘KKK’ mpaka atakapofuta baadhi ya mashairi ya wimbo huo.

Akizungumza jijini Dar es Salaam jana, Roma alisema kwa kuwa anahitaji wimbo wake upigwe redio zote, amelazimika kufuta baadhi ya vipande hivyo vya mashairi.

“Nashukuru Mungu wimbo wangu umepokewa vizuri na unapigwa sehemu mbalimbali, ingawa kuna changamoto ambazo nimekutana nazo lakini najua ndio maisha yanavyoenda hivyo ni kawaida tu,”.

“Mimi nyimbo zangu huwa zinaongea ukweli na unaeyafanya hayo ukisikia lazima utapata hasira kutokana na hilo baadhi ya Ma DJ wakawa wanagoma kuupiga ndio sababu ya kupunguza mashairi ya wimbo huo,” alisema Roma kwa masikitiko.

Roma ni kati ya wasanii ambao wanafanya vizuri katika tasnia ya muziki huo kutokana na ubora wa mashairi ambayo anayatunga na kukubalika katika jamii.

Mwisho.