DIAMOND APENYA TUZO ZA BET

Na Elizabeth John

BAADA ya kupewa nafasi ya kushiriki tuzo ya Televisheni ya Marekani (BET), akiwa ni msanii pekee ambaye anaiwakilisha Afrika Mashariki, Naseb Abdul ‘Diamond Platinum’ amesema anawashukuru Watanzania kwa kumtambua kama ni msanii bora.

Diamond amepata nafasi hiyo baada ya kupata tuzo saba za Kilimanjaro Tanzania Music Awards (KTMA), pia ilipelekea kuwa msanii pekee wa Tanzania ambaye atafanya ziara ya shoo ya MTV Base Afrika Music Award (MAMA) ambayo inaanzia  Dar es Salaam katika ukumbi wa Club Bilicanas leo.

 

Akizungumza jijini Dar es Salaam jana, Diamond alisema anatoa shukrani kwa Watanzania ambao wamezidi kung’arisha nyota yake mpaka katika nchi za kimataifa.

“Nawashukuru sana Watanzania kwa kunikubali katika kazi zangu ambazo kwasasa zimeanza kuvuka mipaka ya Tanzania na mpaka kuchaguliwa katika tuzo hizo kubwa Duniani hivyo nahitaji sapoti sapoti yao zaidi ili niweze kupaa katika mataifa mbalimbali,” alisema.

Alisema, anafikiri haishii kushiriki tu anauhakika atachukua tuzo katika televisheni hiyo ambapo amewataka Watanzania kuendelea kumuombea.

Wasanii ambao wanachuana na Diamond katika tuzo hizo wakiwania tuzo ya msanii bora wa Afrika ni, Davido na Tiwa Savage wa Nigeria, Mafikizolo (Afrika Kusini), Sarkodie (Ghana) na Toofan (Togo).