Nane kushiriki Adnan Kondo Cup

Na Mwandishi Wetu

TIMU nane za soka Kata ya Upanga Magharibi zinatarajia kuwania kombe la Adnan Kondo Cup, mashindano yanayotarajia kuanza Jumamosi ijayo kwenye uwanja wa Shule ya msingi Muhimbili jijini Dar es Salaam.

Kwa mujibu wa Mhamasishaji wa Vijana wa Kata ya Upanga Magharibi  wa Chama Cha Mapinduzi (CCM), Adnan Kondo alisema mashindano hayo yatashirikisha timu saba za Kata ya Upanga Magharibi na moja ya Upanga Mashariki kwa lengo la kuhamasisha vijana kujiunga na chama hicho ikiwa ni mipango ya ushindi wa kimbunga katika uchaguzi Mkuu wa mwakani.

Kondo alisema mashindano hayo yatafanyika kwa wiki nne yatakayokuwa yakichezwa kila mwisho wa wiki ambako timu shiriki ni pamoja na Azania, Jangwani, Tambaza Gym, Tambaza Sekondari, Azania College na Upanga veterani.

Alisema amejipanga kutekeleza michezo mbalimbali ikiwa ni ilani ya CCM ambako michezo mingine aliyojipanga kuitekeleza katika Kata hiyo ni pamoja na Ngumi, Soka la Wanawake na Jogging mipangilio ambayo itakuwa ni mipango tofauti na Kata nyingine kwa sababu atafanikisha michezo hiyo kwa wasichana na wavulana.

Naye mratibu wa mashindano hayo, Ally Tambaza alitaja zawadi kwa mshindi wa kwanza wa mashindano hayo  atakabidhiwa jezi seti moja na medali wakati wa pili atakabidhiwa seti moja ya jezi huku mchezaji bora atakabidhiwa kombe na shilingi 100,000.

Tambaza alisema kabla ya mashindano hayo timu shiriki zitakabidhiwa jezi kwa lengo la kila timu kushiriki mashindano hayo zikiwa na jezi zake.