MAPOKEZI MAKUBWA YAMSUBIRI SAKAYA

Na Mwandishi Wetu

CHAMA Cha Wananchi (CUF), Mkoa wa Tabora kimepanga kufanya maandamano ya kumpokea Naibu Katibu Mkuu Mpya wa Chama hicho Magdalena Sakaya wakati atakapowasili kwa mara ya kwanza mkoani hapo baada ya kupata cheo hicho na kuwatetea wananchi wa eneo hilo wakiwemo wakulima wa zao la  Tumbaku

Akizungumza katika Mkutano wa hadhara uliofanyika katika Kijiji cha Lombe Kata ya Kumbiziganga wilayani Kaliua mkoani Tabora Katibu wa Chama hicho ambnaye pia ni mjumbe wa Baraza Kuu la Uongozi Taifa Kapasha Kapasha alisema Chama chao kimeweka historia katika Taifa kwa kumpatia cheo hicho kuliko vyama vingine vyovyote vya kisiasa hivyo watampokea kishujaa kwa kufanya maandamano akitokea wilayani Kaliua baada ya kutembelea Kata zote za Wilaya hiyo.

Alisema Sakaya ni mpiganaji wa kweli ambaye anatetea haki za wakulima wa Tumbaku na wale wananchi wanaonyanyaswa katika na Serikali kwa madai kuwa wanandishi ndani ya hifadhi wakati wao wenyewe wanajenga vituo vya polisi ndani ya maeneo hayo.

"Haijwahi kutokea kwa Mwanamke kushika wadhifa kama huo alionao Sakaya hivyo kutokana na Chama kumuamini tutampokea kwa maandamano makubwa ili kuonyesha kuwa CUF haina ubaguzi wa watu bali inaangali uwezo wako wa kufanya kazi na kupambana na mafisadi ambao hata wakulima wanazulumiwa naSerikali ipo"alisema Kapasha.

Kapasha alisema, Chama cha Mapinduzi (CCM), kimeufanya Mkoa wa Tabora kuwa ndio sehemu yake ya kuvunia kura katika chaguzi  mbalimbali zinazofanyika lakini ndio mkoa unaoongoza kwa watu wake kuwa masikini wakati ndio wazalishaji wa Tumbaku, na baadhi ya madini ambayo yanapatikana kati mkoa huo.

Kwa upande wake Naibu Mkurugenzi wa Habari na Uenezi wa Chama hicho Abdul Kambaya alisema mama huyo ni shujaa kwani aliwekwa mahabusu kwa siku 14 baada ya kujitokeza hadharani kuwatetea wafugaji walichukuliwa ng'ombe zao na Serikali ya CCM

"CCM ndio wanatumia umasikini wenu kujipataia kura za ushindi maana haiwezekani miaka 20 ya wabunge wenu katika majimbo haya hakuna maji safi wala barabara ya lami wakati wanamfuko wa jimbo na ukitaka kujijua kuwa wewe  ni masikini angalia vitu vitatu ambayo chakula unachokula, sehemu unayolala na na nguo unazovaa ukiona unafanya vitu hivyo bila mapenzi yako ujue wewe ni masikini kwani unahitaji kula nyama lakini unakula wali na maharage ujue wewe ni masikini kwani huna uwezo wa kununua"alisema Kambaya

Alisema haiwezekani kwa miaka 50 ya uhuru watoto waendelee kukaa chini wakati hii hii ni tajiri kuliko nchi zote zinazoizunguka lakini ndio yenye umasikini wa kutisha lakini viongozi wanaangalia familia zao na ndugu zao bila kujali wananchi waliowachagua.

Sakaya ambaye pia ni Mbunge wa Viti Maalum Mkoa wa Tabora anatarajia kumaliza ziara yake leo  mkoani Tabora kwa kufanya Mkutano mkubwa wa hadhara kama Naibu Katibu Mkuu mpya wa CUF Tanzania Bara baada ya kurithi nafasi hiyo kwa mtangulizi wake Julius Mta.