BENKI YA CRDB yataka BOT isishinikizwe

Mkurugenzi Mtendaji wa Benki ya CRDB, Dk. Charles Kimei akifafanua jambo wakati wa mkutano na waandishi wa habari jijini Dar es Salaam jana kuhusu mdororo wa shilingi. Kulia ni Mkurugenzi wa Masoko, Utafiti na Huduma kwa Wateja, Tully Mwambapa.

Waandishi wa habari wakimsikiliza Dk. Charles Kimei.

Na Mwandishi Wetu

WADAU wa maendeleo nchini hususan wanasiasa, wametakiwa kuacha tabia ya kuishinikiza Benki Kuu ya Tanzania (BoT), kudhibiti mdororo wa shilingi ya Tanzania, kwani si njia sahihi na badala yake waache thamani ya fedha hiyo kukua kulingana na mahitaji ya kiuchumi.

Wito huo umetolewa na Mkurugenzi Mtendaji wa Benki ya CRDB, Dk. Charles Kimei, alipozungumzia kushuka kwa thamani ya shilingi ya Tanzania na kusema mashinikizo kutoka kwa wadau hao yanaziathiri taasisi za kifedha, hususan benki.

Dk. Kimei alisema shinikizo hilo linailazimu BoT kuziminya benki, kwani njia nzuri inayotumiwa na taasisi hiyo katika kuzuia anguko hilo na mabadiliko ya fedha za kigeni ni kubana sera za kifedha na kuondoa zaidi shilingi katika mzunguko wake.

“Moja ya athari za kuondoa shilingi katika mzunguko wake ni kupanda kwa riba miongoni mwa watumiaji wa huduma za kibenki, hivyo kupunguza nia ya kukopa waliyonayo wateja wetu na kuathiri mzungunko wetu wa fedha,” alisema Dk. Kimei.

Aliwataka wadau hao, hasa wanasiasa, waguswe kwa namna moja ama nyingine na ukuaji huo wa riba kwa Mtanzania wa kawaida ambao unaathiri harakati za maendeleo, na kwamba waelekeze nguvu zao katika hilo ili kupunguza ukali wa maisha na kuleta maendeleo ya mtu mmoja mmoja na taifa kwa ujumla.