Simbu, Sulle watangulia Olimpiki Tokyo 2020

NA MWANDISHI WETU

WANARIADHA wa Tanzania, Alphonce Simbu na Agustino Sulle wamekuwa wa kwanza kufuzu kwa michezo ya Olimpiki itakayofanyika jijini Tokyo Japan mwakani.

Wanariadha hao wamefanikiwa kukata tiketi hiyo jana nchini Japan, baada yam kukimbia muda mzuri katika Mbio za Lake Biwa Marathon, ambazo zinatambulika na zimepitishwa na Shirikisho la Riadha la Kimataifa (IAAF).

Katika mbio hizo zilizokuwa na ushindani wa hali ya juu kutoka washiriki wa nchi mbalimbali, Simbu kutoka Jeshi la Wananchi Tanzania (JWTZ), na mshindi wa medali ya Shaba ya Dunia, alikamata nafasi ya sita akiandika rekodi yake mpya, akitumia Saa 2:08.27.

Rekodi ya awali ya Simbu kabla ya jana ilikuwa ni Saa 2:09.10 aliyoiweka London Marathon.

Kwa upande wake, Sulle wa Klabu ya Taleny ya jijini Arusha, ambaye anashikilia rekodi ya Taifa Marathon ya Saa 2:07.45 aliyoiweka Toronto Marathon Canada mwaka jana, alishika nafasi ya 17 akitumia Saa 2:12.42.

Muda wa kufuzu kwa Olimpiki ambao unaanza kutambuliwa kuanzia Januari mwaka huu ni Saa 2:14. kwa wanaume Marathon.

Katika mbio za jana Lake Biwa, Tanzania iliwakilishwa na wanariadha watatu mwingine akiwa Gabriel Geay, ambaye alikwenda maalumu kama ‘Pace Maker’.

Katika mbio hizo, mshindi wa kwanza aliibuka Salah Eddine-Bounasr wa Morocco aliyetumia Saa 2:07.52 akifuatiwa na Asefa Tefera wa Ethiopia 2:07.56 huku nafasi ya tatu ikienda kwa Stephen Mokoka wa Afrika Kusinia 2:07.58.

 Akizungumzia matokeo hayo, Katibu Mkuu wa Shirikisho la Riadha Tanzania (RT), Wilhelm Gidabuday, aliwapongeza wanariadha hao na walimu wao kwa mafanikio hayo na kwamba yamekuja wakati muafaka.

Gidabuday, alisema RT chini ya Rais wake Anthony Mtaka na Kamati nzima ya Utendaji, hivi sasa wako kwenye mikakati ya kuhakikisha mwaka huu 2019 unakuwa ni wa kazi kutokana na kukabiliwa na matukio matatu makubwa kimataifa kabla ya Olimpiki 2020.

“Kama mnavyofahamu, hivi sasa RT tunapata sapoti kutoka kwa wadau mbalimbali kutokana na kuridhishwa na uwajibikaji wa wanariadha…Ni hivi karibuni tumeingia makubaliano maalumu na Mamlaka ya Hifadhi ya Ngorongoro kutusapoti katika maandalizi ya mashindano mbalimbali kuelekea Olimpiki Tokyo 2020 hivyo kwa mwanzo huu wa vijana wetu tunaona umekuja wakati muafaka,” alisema Gidabuday.

Katibu huyo, aliongeza kuwa ni mategemeo yao vijana wengi zaidi watazidi kufuzu kwa mashindano mbalimbali ya kimataifa ikiwamo ya Dunia Doha Qatar na Olimpiki Tokyo 2020.