MVUA KUBWA YALETA MADHARA-ARUSHA

 Mvua kubwa iliyonyesha mkoani Arusha imesababisha kuharibika kwa miundombinu ya barabara kama picha inavyoonyesha. (Picha na Grace Macha).

NA GRACE MACHA, ARUSHA

 

MVUA kubwa iliyonyesha kwenye maeneo mbalimbali ya Mkoa wa Arusha imesababisha madhara makubwa ikiwemo kuharibu miundombinu ya barabara,  kunusurika kufa baada ya nyumba kadhaa kuja maji na  kuta kuanguka.

Mvua hiyo ilinyesha usiku wa juzi kuamkia jana ambapo kwenye maeneo mbalimbali ya jiji la Arusha barabara zilijaa maji yaliyokuwa yakipita juu ya barabara.

Aidha,  masiliano yalikatika kwa muda maeneo ya King'ori kwenye barabara kuu ya Arusha - Moshi baada ya kipande cha barabara kuharibiwa na maji ya mvua.

Kwenye baadhi ya barabara za jiji magari yalizuiwa kupita kutokana  na maji ya mvua kupita juu ha barabara.

Wakazi wa kata mbalimbali za jiji la Arusha na wilaya ya Arumeru walionekana wakiwa kwenyw hekaheka za kuzibua mitato ya maji na wengine wakitiboa kuta za nyumba zao kuruhusu maji ya mvua kupita.

Kata zilizopata madhara ni pamoja na Osunyai Jr, Unga LTD, Kimandolu,Engutoto, Moshono na Kiranyi ambapo baadhi ya wakazi wamelazimika kuhama nyumba zao kutokana na  kujaa maji.

Meneja wa Wakala wa barabara Tanzani (Tanroads), Mkoani Arusha, Mhandisi, John Kalupale, alithibitisha maji ya mvua kusababisha madhara makubwa ya uharibifu wa miundombinu ya barabara kwenye baadhi ya barabara wanazozihudumia.

“Barabara ya Arusha kwenda Moshi eneo la King’ori imevunjika na magari madogo yalizuiliwa kwa muda, lakini barabara zilizoharibika utaratibu wa kuzikarabati umeshaanza,”alisema Kalipale.

Kalupale alisema kuwa wataalam wa Tanrods wako wanatembelea na kukagua barabara zote zilizoathirika ili kutambua ukubwa wa tatizo.

“Tutatembelea barabara zote kuangalia ukubwa wa madhara yaliyosababishwa na mvua hii na baada ya hapo tutatoa taarifa kamili,”alisema Kalupale.

Kwa upande wake Kamanda wa Polisi Mkoa wa Arusha, Jonathan Shana  alipotafutwa kwa njia ya simu alipokea msaidizi wake na kusema kuwa kiongozi huyo yuko kwenye kikao na Mkuu wa Mkoa wa Arusha, Mrisho Gambo.

Hata hivyo RPC Shana alionekana akipita maeneo mbalimbali ya jiji la Arusha ambapo msaidizi wake mmoja alionekana alionekana akimuokoakijana mmoja aliyekuwa akisombwa na maji.