WASTAAFU 5000 WAHAKIKIWA MBEYA

NA KENNETH NGELESI, MBEYA

MFUKO wa Hifadhi ya Jamii kwa Watumishi wa Umma (PSSSF) Mkoa wa Mbeya  umefanikiwa kuwahakiki zaidi ya wastaafu 5000 ambao ni wanachama Mfuko huo tangu Rais John Magufuli kutaka watataafu wote wahakikiwe.

Meneja wa Mfuko huo wa PSSF Mkoa wa Mbeya, Joseph Fungo, alisema kuwa baada ya agizo la Rais Ofisi ya PSSSF mkoa ilianza zoezi hilo mara moja na hadi kufikia mwezi machi mwaka  idadi kubwa ya wastaafu walikuwa wamehakikiwa na kuendelea kupata stahiki zao.

Fungo alisema kuwa idadi hiyo ya wanachama ni kutokana jitihada ambazo zimesaidia kufanikisha zoezi hilo kwa kiasi kikubwa ni pamoja na kuwa na utaratibu  wa kuwatembelea na kuwahakiki wastaafu hao majumbani kwao kwa wale ambao  wanamatatizo mbalimbali yakiwemo ya ulemavu na kuugua kwa muda mrefu.

‘’Zoezi la kuwatembelea watassfu ambao wanamatatizo mbalimbali yakiwemo ya kuumwa na ulemavu majumbani kwao limekuwa msaada mkubwa  katika kufanikisha zoezi la uhakiki’’alisema fungo.

Aidha,Fungo alisema kuwa tangu kuanza kwa zoezi la uhakiki kumekuwa na kiwango kikubwa cha mwitikio wa wanachama,wastaafu na ndugu kufika katika ofisi za PSSSF kwajili ya kupata huduma mbalimbali.

Alisema kwa siku wastani wa wateja zaidi ya 200 wamekuwa wakihudumiwa  tangu mfuko huo ulipo anzishwa  baada ya mifuko mnne kuunganishwa  na kuwa mfuko mmoja.

Fungo alisema kutokana na mwitikio huo ofisi yake imekuwa ikijitahidi kuwahudumia wateja  wakiwemo wastaafu kwa wakati ili kukidhi matakwa na mahitahi ya wateja.

Alisema katika zoezi hilo la uhakiki wa wastaafu wamebaini mambo mbalimbali likiwemo suala la baadhi ya watu wa karibu  kuendelea kunufaika  na mafao  licha ya baadhi ya wastaafu kufariki dunia hatua ambayo imesaidia kuokoa upotevu mkubwa wa fedha za umma.

Mmoja wa wastaafu ambaye hakuwa tayari kutaja jina,alisema kuwa tangu kuunganishwa kwa mifuko hiyo na kuwa mfuko mmoja,amepongeza huduma bora zinazotolewa na watumishi wa PSSSF kwa mkoa wa Mbeya. 

‘’Niwe muwazi  huduma  za mfuko wa PSSSF zimeboreshwa   kwa kuwa  tangu nifike hapa nimehudumiwa kwa wakati  na hivyo niishukuru serikali kwa kuunganisha mifuko hiyo na kuwa mfuko mmoja’’alisema