KANYASU: WAWEKEZAJI KATIKA HIFADHI ZA MAZINGIRA ASILIA

Na Tatu Mohamed, Dar es Salaam

NAIBU Waziri wa Maliasili na Utalii, Constantino Kanyasu, amewaalika wawekezaji kutoka katika mataifa mbalimbali kuwekeza katika hifadhi za mazingira asilia kote nchini.

Uwekezaji huo ni katika ujenzi wa miundombinu, hoteli, kambi za utalii, vituo vya utafiti, utalii wa parachuti na mwingineo

Akizungumza katika Maonyesho ya 43 ya Biashara ya Kimataifa Dar es Salaaam (DTIF), Kanyasu amesema lengo ni kuhakikisha mtalii anapoingia hifadhini anapata huduma zote muhimu

"Serikali tumeamua kuwekeza nguvu katika hifadhi zetu zote zinazobeba misitu, tumejipanga kujenga miundombinu madhubuti na ndio maana tumewaalika wawekezaji waje sasa, wajenge mahoteli.

"...na tunataka hata huduma za kibenkina nyingine zote ziwepo ili mtalii anapoingia hifadhi asihangaike tena kwenda kutafuta huduma nje, tunataka akifika msitu apate chakula, alale apate huduma za kifedha," amesema Kanyasu

Ameongeza kuwa uboreshaji wa Ikolojia katika hifadhi hususani za misitu ni muhimu katika kuhamasisha utalii

Pia Kanyasu amesema katika msimu wa maonyesho hayo, Wakala wa Huduma za Misitu Tanzania (TFS) imeandaa safari za utalii kwa washiriki na ambao watafika katika maonyesho hayo kwa kuwapeleka katika hifadhi ya mazingira asilia ya Maghamba iliyopo Lushopo  mkoani Tanga kuanzia Julai 12 hadi 14 mwaka huu.

Mbali na hayo, Kanyasu amesema serikali imeweka mkakati wa kuhuisha mashamba yote ya hifadhi za misitu  yaliyokuwa yameshaharibiwa.