MBUNIFU WA MTAMBO WA KUFUA UMEME HAWA KIVUTIO KATIKA BANDA LA COSTECH SABASABA

Na Tatu Mohamed

 

MTANZANIA George Ulaya (pichani), amebuni mtambo wa kufua umeme unaotumia upepo wenye Watt 50,000 ambao utatumika kuendesha viwanda na matumizi ya umeme katika kijiji kizima.

Ulaya akiwa chini ya Tume ya Taifa ya Sayansi na teknolojia (COSTECH) aliweza kuelezea jinsi alivyoanza kwa ubunifu huo akiwa Sumbawanga na sasa anasambaza teknolojia hiyo katika mikoa mbalimbali nchini.

Akiwa katika viwanja vya maonesho ya 43 ya kimataifa ya biashara ya Dar es salaam (DITF) yanayofanyika katika viwanja vya Mwalimu Julius Nyerere, Ulaya ambaye yuko katika banda la COSTECH amesema alianza na kutengeneza mashine ya kufua umeme kwa njia ya upepo wa Watt 300 lakini kwa sasa baada ya kuwezeshwa na Tume ya Sayansi ameendelea na kutengeneza mashine ya kisasa inayotoa  Watt 50,000.

"Nawashukuru COSTECH baada ya mwaka 2010 kunipa tuzo ya ubunifu huu na kunisaidia sasa nimepaa nipo kiteknolojia zaidi kwa maana natumia nyenzo mbalimbali za kisasa na nimekuwa mbunifu mkubwa wa kutengeneza mashine mbalimbali," amesema Ulaya.

Amesema kupitia mashine hiyo umeme wake unatumika katika kijiji kizima na hata upepo ukikatika umeme unaendelea kuwaka.

"Mashine hii ni gharama nafuu, pia itasaidia kwenye uchumi wa viwanda kwasababu watu wanatumia umeme kuendesha shughuli zao mbalimbali," amesisitiza.