TAASISI ZA DINI, VYAMA VYA SIASA NA KLABU ZA SOKA VINARA KULIPA ADA

 Wakili wa Serikali  Mwandamizi, Edna Kamara, akizungumza na waandishi wa habari kwenye viwanja vya Maonyesho ya 43 ya Biashara ya Kimataifa (DITF) maarufu Sabasaba yanayoendelea kwenye viwanja vya mwalimu Nyerere Barabara ya Kilwa jijini Dar es Salaam.  

Na Tatu Mohamed

IMEBAINISHWA kuwa Taasisi za kidini, vyama vya siasa na klabu za mpira wa miguu ndizo zinaongoza katika kulipa marejesho ya mwaka kwa wakala wa Usajili, Ufilisi na Udhamini (RITA), ukilinganisha na taasisi nyingine.

Hayo yamesemwa  na Wakili wa Serikali  Mwandamizi, Edna Kamara kwenye viwanja vya maonyesho ya 43 ya biashara ya Kimataifa (DITF) maarufu sabasaba yanayoendelea kwenye viwanja vya mwalimu Nyerere barabara ya Kilwa jijini Dar es Salaam. 

Kamara amezitaka taasisi nyingine ambazo zinasuasua kulipa ada ya marejesho ya kila mwaka kwa kuzingatia sheria ya kulipia kwa tarehe husika ambayo bodi imesajiliwa ili kuepuka adhabu za kisheria zikiwamo faini.

Amefafanua bodi ya wadhamini inatakiwa kufanya mrejesho kila mwaka tarehe husika kwa kujaza fomu namba T.1.5  na kulipia ada ya Sh 50000 kwa mujibu wa sheria ya muunganisho sura ya 318 toleo 2002 kuepuka kulipa faini ambapo wasipofanya hivyo watalazimika kulipa faini.

"Hapa kwenye maonyesho tunatoa huduma hii, hivyo ambao wataona uvivu kufika ofisini kwa ajili ya kulipia wake hapa" amesema Kamara.

Amesema vyama vya siasa ambavyo vinasuasua kulipa ada hii vitabanwa na sheria ya uchaguzi unaokaribia.