TADB yaahidi kukipa nguvu kiwanda cha TANICA kuboresha kahawa

 Mkurugenzi Mtendaji wa Benki ya Maendeleo  ya Kilimo  Tanzania (TADB), Bw.Japhet Justine (kulia) akizungumza na baadhi ya wafanyakazi wa kiwanda cha kahawa cha TANICA. Kushoto ni Mkuu wa Mkoa wa Kagera, Brigedia Jenerali Marco Gaguti muda mfupi baada ya kutembelea kiwanda hicho mjini Bukoba hivi karibuni. TADB imeahidi kukiongezea nguvu kiwanda hicho ili kiongeze uzalisahaji zaidi.

 Mkurugenzi Mtendaji wa Benki ya Maendeleo  ya Kilimo  Tanzania (TADB), Bw.Japhet Justine (kulia) akijadiliana jambo na Mkuu wa Mkoa wa Kagera, Brigedia Jenerali Marco Gaguti muda mfupi kabla ya kutembelea kiwanda cha kahawa cha TANICA mjini Bukoba hivi karibuni.TADB imeahidi kukiongezea nguvu kiwanda hicho ili kiongeze uzalisahaji zaidi.

 Na Mwandishi Wetu, Kagera

BENKI ya Maendeleo  ya Kilimo  Tanzania (TADB) imeahidi kukiongezea uwezo kiwanda cha Tanganyika Instant Coffee (TANICA) kinachochakata kahawa mkoani Kagera kwa lengo la kukuza mnyororo wa thamani wa zao

hilo nchini.

Akizungumza na waandishi wa habari katika ziara yake mkoani humu, Mkurugenzi Mtendaji wa TADB, Bw.Japhet Justine amesema ni muhimu kuongeza nguvu kiwanda hiki kwani  kuwepo kwake kunaatoa soko la uhakika kwa wakulima wa kahawa.

‘’TADB imedhamiria kukiendeleza kiwanda cha TANICA ili  kuchakate kahawa hapa hapa  na  kuiongezea thamani na kuifanya iwe ni kahawa yenye ushindani katika soko la ndani na nje,” amesema Bw.Justine.

Amesema kuna kila sababu ya kukiongezea nguvu kiwanda hicho  kwani kuchakata kahawa  kutachangia kutengeneza ajira, pia  kutasaidia kujenga soko la ndani la uhakika la kahawa kwa wakulima na kuchochea uzalishaji na ubora wa kahawa.

“ Benki ilitoa mkopo wa shilingi bilioni 30 katika msimu wa mwaka jana zitumike katika zoezi la ukusanyaji na ununuzi wa kahawa kutoka kwa wakulima mkoani humu.  Kwa mafanikio yaliyopatikana katika zao la msimu  uliopita,  tunataka msimu huu mgao wa kwanza uende TANICA ili

kahawa yetu ichakatwe hapa hapa nchini ili thamani yake iongezeke,’’ ameeleza  Bw.Justine.

Amekumbusha kwamba  kiwanda kama hicho  kipo toka 1963, na kuongeza kwamba  kikiendelezwa  kahawa ya Tanzania itapanda thamani itawavutia wanunuzi wa ndani na nje, na kuwafanya  Watanzania kutumia kahawa iliyotengeneza hapa hapa nchini.

Amesema kwa sababu ya  juhudi ya pamoja ya msimu uliopita  kahawa imezalishwa kwa wingi na imekuwa  na ubora unaotakiwa katika soko na kusema ni muhimu sasa kujikita katika kuwekeza kwenye viwanda vya kuchakata kahawa ili kuiongezea thamani na kuifanya kahawa ya Tanzania kuwa ya ushindani katika masoko ya nje.

‘’Tunaendelea kutekeleza kwa vitendo azma ya Serikali ya Awamu ya Tano chini ya Rais Dk.John Magufuli ya kujenga uchumi wa kati na wa viwanda ifikapo  mwaka 2025.  Na hili limejidhihirisha kupitia mafanikio yanayoonekana kwa wakulima,’’ amesema Bw. Justine.

Mkuu wa Mkoa wa Kagera, Brigedia Jenerali Marco Gaguti, ameishukuru Benki ya TADB kwa ushirikiano ambao amesema umeleta mafanikio katika kuboresha na kukuza uzalishaji wa zao la kahawa  mkoani Kagera. ‘’Mkoa utaendelea kutoa ushirikiano katika uamuzi wa TADB wa

kukiendeleza kiwanda cha TANICA  jambo hili  litachochea ukuaji wa uchumi na kuongeza ajira kwa vijana,’’ alisema Bw. Gaguti.

Amesema azma ya serikali ni kujenga viwanda nchini, hivyo kwa kukiendeleza kiwanda  cha TANICA kunaonyesha  agizo la serikali kujenga viwanda umefanyiwa kazi na watendaji wake.