Wazazi washauriwa kuendeleza talanta za watoto wao

Mhandisi Mshauri Dkt. Yonah Zaipuna akitoa ufafanuzi kwenye warsha ya  “The Power of talent.” ya siku moja iliyolenga kuwafanya vijana waweze kuzijua na kuzitumia talanta zao katika kujikwamua kiuchumi  iliyofanyika  jijini Dar es Salaam mwishoni mwa wiki.

 

 

Na Mwandishi Wetu

WAZAZI nchini wametakiwa  kulea vipaji  vya watoto  wao  kama sehemu ya kuwajengea uwezo na maarifa yatakayowawezesha kujiajiri na hatimaye kutoa mchango mkubwa katika ujenzi wa uchumi.

Akizungumza na waandishi wa habari Jijini Dar es Salaam  baada ya warsha ya kueleza nguvu ya vipaji au talanta (The Power of Talent), Mwanasheria na Mtunzi wa Mashairi, Aisha Kingu, amesema wazazi au walezi wana nafasi kubwa ya kukuza talanta za watoto wao.

“Nimeandaa warsha hii ili kwa pamoja tujadili namna nzuri ya kutambua na kuendeleza vipaji vya vijana ili viwe nyenzo muhimu katika kujiinua kiuchumi,” almesema na kuongeza: “Hayo yote yanawezekana iwapo tu wazazi na walezi wataamua kwa dhati kuunga mkono  talanta za vijana na kuwafanya watimize ndoto zao za kimaisha.”

Mmoja washiriki, Dk. Kingu Mtemi, ametoa ushuhuda wa wazazi  kuendeleza talanta za watoto na kufafanua taabu inayoambatana na ulezi wa aina.  “Sisi wazazi mwanzoni tulikuwa na wakati mgumu kwani tuliamini binti yetu angekuwa daktari. Lakini kadiri muda ulivyoenda tulizoea hali hiyo na kuamua kuunga mkono kipaji chake cha uandishi wa mashairi ambacho alikionyesha tangu hatua za awali ya masomo yake,” alisema Dk. Mtemi

 Aisha ni mtoto wa Dk Mtemi.  Bw Mtemi ameeleza kuwa baada ya kumwacha Aisha ajikite katika fani aipendayo alifanikiwa baada ya muda mfupi tu.

“Kwa kipindi kifupi binti huyu amepata mafanikio makubwa ikiwemo kuwaandikia mashairi viongozi wa ndani ya nchi akiwemo Rais mstaafu Jakaya Mrisho Kikwete. Lakini pia safari yake ya mashairi imemkutanisha na Rais Putin wa Urusi,  Malikia Elizabeth wa Uingereza pamoja na watu maarufu mbali mbali duniani,” alisema

Dk Mtemi ameshauri  wazazi na walezi wajitahidi  kugundua na kuendeleza talanta za watoto na kusisitiza kuwa watoto wawe huru  kufanya  wanavyovipenda na kuepuka  kuwalazimisha watoto kuingia katika fani wanazozipenda na wazazi au walezi.

Elham Mwema amepongeza  waandaji wa warsha ili wazazi waelewe umuhimu  wa kugundua na kuendeleza talanta watoto wao.

“Warsha imekuwa nzuri na imetufanya vijana tuone nguvu za vipaji na kutambua njia za kuendeleza vipaji . Tumeona kwamba kipaji kikiendelezwa  ni rahisi kufanikiwa kiuchumi na maana  mafanikio  yanatokana na kufanya kitu ambacho kwako unakifurahia,” alisema Mwema.