Mabula kibariki Mashindano ya Riadha ya Taifa ya Ngorongo Crater

MBUNGE wa Nyamagana Stanslaus Mabula, anatarajiwa kuwa mgeni rasmi katika mashindano ya Riadha ya Taifa ya Ngorongoro Crater 'Ngorongoro Crater National Athletics Championship ' yanayotarajiwa kuanza kutimua vumbi kesho Jumamosi kwenye viwanja vya Chuo cha Ualimu Butimba jijini Mwanza.

Kwa Mujibu wa Msemaji wa Shirikisho la Riadha Tanzania (RT), Tullo Chambo, Mheshimiwa Mabula amethibitisha kuwa mgeni rasmi katika mashindano hayo.

Chambo, alisema maandalizi yanaendelea vema na mikoa tayari imeishaanza kuwasili.

Aliitaja mikoa iliyokuwa imewasili hadi Ijumaa mchana ni 13 ambayo ni Simiyu, Mwanza, Singida, Dodoma, Tabora, Mara, Geita, Morogoro, Mjini Magharibi, Kusini Unguja, Kaskazini Unguja,  Kaskazini Pemba, Kusini Pemba.

"Tunategemea mikoa mingine itaendelea kuwasili na kupokelewa hadi usiku tayari kwa mashindano haya, ambayo tunatarajia kuona vipaji vipya na ushindani mkali," alisema.

Chambo alitoa wito kwa wakazi wa Jiji la Mwanza na maeneo ya jirani, kujitokeza kwa wingi kushuhudia mashindano hayo.