MAFUNZO YA PAMOJA KUIMARISHA USHIRIKIANO SAPRPCCO

Mkuu wa Jeshi la Polisi Nchini IGP Simon Sirro akimkaribisha Mwenyekiti wa Shirikisho la Wakuu wa Polisi wa nchi za ukanda wa Kusini mwa Afrika (SARPCCO) na Mkuu wa Jeshi la Polisi Zimbabwe Kamishna Jenerali  Matanga leo Makao Makuu ya Polisi jijini Dar es Salaam. (Picha na Hassan Mndeme - Jeshi la Polisi).

 Na Tamimu Adam – Jeshi la Polisi

Mkuu wa Jeshi la Polisi nchini, IGP Simon Sirro amesema Tanzania inanufaika kiulinzi na usalama kutokana na kuwa mjumbe wa Shirikisho la Wakuu wa Polisi wa nchi za ukanda wa Kusini mwa Afrika (SARPCCO).

IGP Sirro alisema hayo wakati  akiongea na vyombo vya habari mara baada ya kikao na Mwenyekiti wa Shirikisho hilo Kamishna Jenerali wa Jeshi la Polisi Zimbabwe, TG Matanga ambaye yupo nchini kwa ziara maalum.

Aliongeza kuwa kutokana na Tanzania kuwa mwanachama wa shirikisho la wakuu wa Polisi kwa nchi zilizopo kusini mwa Afrika Tanzania,  imefanikiwa kwa kiasi kikubwa kuzuia na kudhibiti makosa yanayovuka mipaka yakiwemo makosa ya usafirishaji haramu wa binadamu, wizi wa magari pamoja na dawa za kulevya.

Kwa upande wake Mwenyekiti wa Shirikisho hilo ambaye pia ni Mkuu wa Jeshi la Polisi  la nchini Zimbabwe, Kamishna Jenerali TG Matanga, alisema yupo hapa nchini kwa ziara maalum ya kufanya tathmini ya utekelezaji wa maazimio ya INTERPOL pamoja na maazimio ya SARPCCO.

Kamishna Matnga alisema operesheni za pamoja zinazofanyika kwa kushirikiana baina ya nchi mbili,  operesheni za kikanda pamoja na  kimataifa kama operesheni Usalama  zimeonesha mafanikio makubwa baina ya nchi wanachama katika uhalifu wa ndani na ule unaovuka mipaka , hivyo ameitaka Tanzania kuendelea kuwa mstali wa mbele katika operesheni mbalimbali zinazoratibiwa na shirikisho hilo.

Aliongeza kuwa,  ili kuimarisha shirikisho hilo ni muhimu kuwekea msisitizo eneo la mafunzo ya pamoja ili kupambana na  wahalifu na uhalifu unaovuka mipaka.