TAARIFA YA JESHI LA POLISI KUHUSU VIFO MKOANI KILIMANJARO

Ndugu Wanahabari,

Napenda  kupitia kwenu kuwajulisha kuwa hali ya ulinzi na usalama  nchini ni shwari kwani uhalifu  unaendelea kudhibitiwa.

Hata hivyo yapo matukio ambayo yamesababisha vifo kwa watanzania wenzetu vilivyosababishwa na mvua zinazoendelea kunyesha katika mikoa mbalimbali na tukio la waumini waliokuwa kwenye ibada ya maombi kule Mkoani Kilimanjaro kukanyagana na kusababisha vifo vya watu 20 na wengine takribani 16 kuumia sehemu mbalimbali na wanaendelea na matibabu.

Ndugu wanahabari,

Tukio lilitokea Mkoani Kilimanjaro ni tukio baya  kwani watanzania wenzetu walikwenda kwenye ibada lakini hawakutarajia wangepoteza maisha.

Makongamano na ibada za maombi zimefanywa mara nyingi kupitia viongozi wa madhehebu mbalimbali na hakuna madhara yaliyotokea. Hata hivyo aliyeendesha ibada hiyo kuanzia tarehe 30/01/2020 na tarehe 01/02/2020 ikiwa ndiyo ilikuwa hitimisho amefanya ibada kama hizo maeneo mengine lakini hakuna madhara ambayo yamewahi kutokea.

  

Ndugu wanahabari,

Kutokana na hali hiyo ndiyo maana tukio hilo limechukuliwa hadi sasa kama taarifa ya vifo na siyo mauaji.  Jeshi la Polisi kama ilivyoelezwa awali lilimkamata Boniface Mwamposa na wenzake walioandaa kongamano hilo la ibada na kuchukua maelezo yao. Pia  uchunguzi wa kina unaendelea kufanywa kwa kushirikiana na vyombo vingine vya dola na pale ambapo itabainika kwamba kunakosa la jinai lilitendwa na kupelekea kutokea kwa vifo hivyo na majeruhi hao hatua stahiki zitachukuliwa dhidi ya wote waliohusika kwa mujibu wa sheria.

Aidha, mapungufu watakayo yabaini katika uchunguzi huo yatasaidia kuweka mikakati thabiti ili kuepusha madhara kama hayo kutokea tena katika mikusanyiko mbalimbali.

Ahsanteni kwa kunisikiliza

Imetolewa na:

Davide A. Misime  - SACP 

Msemaji wa Jeshi la Polisi

Makao Makuu ya Polisi.