Serikali yasikia kilio tozo miamala mipya ya simu

Waziri wa Fedha na Mipango, Dkt. Mwigulu Lameck Nchemba akizungumza na Vyombo vya Habari kuhusu masuala mbalimbali ya tozo za miamala ya simu leo Jijini Dar es Salaam kulia ni Waziri wa Mawasiliano na Teknolojia ya Habari Dkt. Faustine Ndugulile.

NA BENNY MWAIPAJA, DAR ES SALAAM

WAZIRI wa Fedha na Mipango Dk Mwigulu Nchemba , amesema Serikali imesikia kilio na maoni ya wananchi kuhusu tozo mpya ya miamala ya simu na kuwaomba wawe watulivu wakati jambo hilo linatafutiwa ufumbuzi.

Dk Nchemba ameyasema hayo Jijini Dar es Salaam wakati akizungumza na vyombo vya habari huku akiwa ameambatana na Waziri wa Teknolojia ya Habari na Mawasiliano Dk Faustine Ndugulile.

“Kuna maaneo ambayo wananchi wametoa ushauri na kuelezea namna ambavyo jambo hili linawagusa lakini pia tumepokea maoni ya maeneo  yanayotakiwa kutoa elimu zaidi ili kujenga uelewa wa pamoja ikiwa ni pamoja na viwango vinavyokatwa kwa anayetuma na anayetoa lakini pia kuhusu mantiki ya jambo lenyewe,” alisema.

Alisema kuwa jambo la tozo za miamala linatekelezwa kupitia Sheria iliyopitishwa na Bunge lakini kuna Kanuni za utekelezaji zinazo mhusu yeye kama Waziri wa Fedha na Mipango na maeneo mengine yanahusu Wizara ya Teknolojia ya Habari na Mawasiliano ambazo zitajadiliwa na kupatiwa ufumbuzi.

Dk. Nchemba alisema, kuwa leo atakuwa na kikao kilichoitishwa na Waziri Mkuu Kassim Majaliwa, kujadili suala hilo na pia kutakuwa na kikao kingine cha Mawaziri wa Wizara zote watakaojadili na kuchambua kwa kina suala hilo.

“Lakini Tayari Rais Samia Suluhu Hassan naye alishaguswa na jambo hili, amesikia maoni ya watanzania wote na yeye ametoa maelekezo kwamba tuyafanyie kazi maoni hayo,

…Nitoe rai kwa wananchi kuwa watulivu kwenye jambo hili, tutaendelea kuelezea na kutoa ufafanuzi kwenye kila maeneo yanayohitaji ufafanuzi na tutachukua hatua kwenye maeneo wanayohitaji kuchukuliwa hatua ili ujenzi wa taifa letu uendelee kama ambavyo wananchi wamekuwa na shauku kubwa kuona ujenzi wa Taifa letu unaendelea kwa ajili ya maendeleo ya nchi,” Aliongeza.

Dkt. Nchemba aliwaonya watu wenye nia mbaya ambao mara zote wanapenda kupotosha ama kubadili dhana au maana halisi ya jambo lilivyokusudiwa na kuwataka wasifanye hivyo, kwani mambo haya yana maslahi mapana kwa nchi.

“Haya ni mambo ya kisheria, Sheria za nchi zinatakiwa kuheshimiwa, ni mambo ambayo ni ya kikanuni  yanayohitaji uelimishaji.

…Tutaendelea kufafanua lakini yale yanayotakiwa kufanyiwa kazi niwaahidi watanzania, tutaendelea kuyafanyiakazi kama ambavyo viongozi wetu wakuu wamesema” Alisisitiza.

Alisema tayari aliwapa maelekezo wataalam wa mifumo kuangalia vipengele vya Sheria ya Mifumo ya malipo Serikalini pamoja na Sheria ya Mawasiliano ya Mtandao (EPOCA) inayoelezea kuhusu masuala ya miamala kwa njia ya mtandao na kuja na mapendekezo yatakayosaidia kufikia muafaka wa jambo hilo.

Alitoa rai  kwa watanzania waendelee kumuunga mkono Rais Samia Suluhu Hassan katika Dira yake ya kuhakikisha anasukuma mbele shughuli za maendeleo ya nchi na ili tuwakomboa na kuwakwamua wananchi kiuchumi.

Kwa upande wake Waziri wa Teknolojia ya Habari na Mawasiliano Dk. Faustine Ndugulile alibainisha kuwa Wizara yake pia ambayo inaguswa moja kwa moja na tozo hizo imeendelea kupokea maoni na kuchakata taarifa mbalimbali tangu tozo hiyo ianzishwe na kumwahidi Waziri wa Fedha na Mipango kwamba atampa ushirikiano kuhakikisha kwamba maelekezo yaliyotolewa na viongozi yanatekelezwa.

Alirejea kutoa wito kwa watanzania kuwa watulivu wakati jambo hilo linafanyiwa kazi na kusema kuwa Serikali ni sikivu na itafikia muafaka mzuri.