KIKOSI KAZI KUKUTANA NA TAASISI NA WATU BINAFSI KABLA YA VYAMA VYA SIASA

 

Sisty Nyahoza, Katibu wa Kikosi Kazi cha Rais wa Jamhuri ya Muungano wa Tanzania.

Na ORPP

Kikosi Kazi cha Rais wa Jamhuri ya Muungano wa Tanzania kimebadili ratiba yake iliyotolewa tarehe 5 Mei, 2022. Kwa mujibu wa taarifa iliyotolewa jana na Katibu wa Kikosi Kazi hicho Sisty Nyahoza, wajumbe wa Kikosi Kazi wataanza kukutana na taasisi pamoja na watu binafsi badala ya vyama vya siasa kama ilivyoelezwa awali.

 

Kwa mujibu wa ratiba hiyo Kikosi Kazi kitaendelea kukutana na wadau mbalimbali wa demokrasia ya vyama vingi nchini kuanzia siku ya Jumanne tarehe 10 Mei, 2022 kwenye ukumbi wa Chifu Adam Sapi Mkwawa, ofisi ndogo za Bunge Jijini Dar-es-salaam. Siku hiyo Kikosi Kazi kitaanza kwa kukutana na taasisi ya The Right Way kuanzia saa nne hadi saa tano asubuhi. Mchana kuanzia saa sita kitakutana na Msajili wa Vyama vya Siasa Mstaafu John Tendwa na kukamilisha ratiba yake kwa kukutana na Kituo cha Utawala Bora na Maendeleo (CEGODETA) kuanzia saa nane hadi tisa mchana. 

 

Siku ya Jumatano itakuwa zamu ya Jumuiya ya Wahindu Tanzania kuanzia saa nne hadi tano asubuhi. Mchana Kikosi Kazi kuanzia saa sita mchana kitapata wasaa kupokea maoni ya Sheikh Ponda Issa Ponda na baadae Askofu Emaus Mwamakula wa Kanisa la Moravian. 

 

Alhamisi Kikosi Kazi saa nne asubuhi kitakuna na Askofu wa Kanisa la Kiinjili la Kilutheri Dayosisi ya Karagwe Benson Bagonza, mchana kuanzia saa sita itakuwa zamu ya Dkt. Hellen Kijo Bisimba kuwasilisha maoni yake na baadae kitapokea maoni ya mwanazuoni wa fani ya sheria Profesa Issa Shivji.

 

Siku ya Ijumaa Kikosi Kazi kitapokea maoni ya mwanasheria na mwanahabari mkongwe Jenerali Twaha Ulimwengu na mwanasheria Fatma Karume kuanzia saa tatu hadi tano asubuhi.

 

Ratiba ya inaonesha wiki inayoanza tarehe 16 Mei, 2022 Kikosi Kazi kitaendelea kukutana na taasisi mbalimbali na watu binafsi. Kikosi Kazi kitakutana na taasisi kama Chama cha Wakulima Tanzania (TASO), Tume ya Haki za Binadamu na Utawala Bora, Mtandao wa Wanawake wa Katiba, Uchaguzi na Uongozi Tanzania. Watu binafsi ni pamoja na mwanahabari Maria Sarungi, Wadhibiti na Wakaguzi Wakuu wa Hesabu za Serikali wastaafu Profesa Mussa Assad na Ludovick Utouh.