TWANGA PEPETA HAWANAGA SHUGHULI MBOVU ...CHOMBO YA FUNDI KUISIMAMISHA NCHI

Na Said Mdoe

Ni kama vile mwari kafichuliwa rasmi, fumbo la jina gani litapeba albam ya 15 ya Twanga Pepeta inayozinduliwa leo usiku (Disemba 17), limefumbuliwa.

"Chombo ya Fundi" ndiyo jina la albam mpya,  mashabiki wa Twanga Pepeta wameamua hivyo kupitia kura zilizopigwa katika kurasa za mitandao ya kijamii za bendi hiyo.

Tukio litakaloandamana na uzinduzi wa albam limepewa jina la Twanga Pepeta Forever,  litafanyika Gwambina Lounge (zamani TCC Club), Chang'ombe, ambapo jumla ya nyimbo sita mpya zinazounda "Chombo ya Fundi" zitarindima jukwaani.

Nyimbo hizo ni "Chombo ya Fundi" na "Dr Rubby" utunzi wake Ally Chocky, "Shobo" ingizo la kijana mdogo Joshua Pianno, "Mmbeya" wa Khalid Chokoraa, "Lengos VIP" uliotungwa na Chaz Baba huku wimbo wa mwisho ukiwa ni "Twanga Pepeta Show".

Twanga Pepeta hawanaga shughuli mbovu pale linapokuja suala la kuandaa matukio makubwa, namba hazidanganyi kuanzia albam yao ya kwanza ya "Kisa Cha Mpemba" na kuendelea. Nchi huwa inasimama na hakuna shaka kuwa "Chombo ya Fundi" inakwenda kuendeleza utamaduni wa bendi hiyo.