CRDB, Visa wakabidhi tiketi kwa mshindi wa kampeni ya ‘Tisha na Tembocard Tukakiwashe AFCON’

 

Mkurugenzi wa Wateja Wadogo Benki ya CRDB, Boniventure Paul (wa pili kushoto) akimkabidhi mfano wa tiketi ya ndege mshindi wa Kampeni ya Benki ya CRDB  ‘Tisha na Tembocard Tukakiwashe AFCON’  Evelyne Rwebugisa, katika hafla iliyofanyika Makao Makuu ya benki hiyo jijini Dar es Salaam leo Disemba 22, 2023. Wa pili kulia ni Mkuu wa Kitengo cha Kadi CRDB, Farid Seif.

 

Na Francis Dande, Dar es Salaam

BENKI ya CRDB kwa kushirikiana na kampuni ya Visa inayoongoza katika mfumo wa malipo ya kidigitali, imekabidhi tiketi kwa mshindi wa kampeni ya  ‘Tisha na Tembocard Tukakiwashe AFCON’.

 

Akizungumza wakati wa makabidhiano ya tiketi ya ndege kwa mshindi wa Kampeni hiyo, Evelyne Rwebugisa,  jijini Dar es Salaam leo Disemba 22, 2023, Mkuu wa Kitengo cha Kadi Benki ya CRDB, Farid Seif amesema kuwa lengo la kampeni hii ni kuhamasisha matumizi ya kadi zake za TemboCard Visa, ambapo wateja nane watakaofanya miamala mingi zaidi watapelekwa nchini Ivory Coast kushuhudia mashindano ya TotalEnergies CAF Africa Cup of Nations (AFCON) 2024.

Kampeni hiyo ambayo ni sehemu ya juhudi zinazofanywa na Benki ya CRDB kupunguza matumizi ya fedha taslimu na kuhamasisha matumizi ya mifumo ya kidigitali ilizinduliwa Novemba 2, 2023 na itadumu kwa miezi mitatu mpaka Januari mwakani.

 

 

Mshindi wa kampeni hiyo Evelyne Rwebugisa amesema "Nimefurahi sana na sikutegemea kabisa, nachoweza kuwaambia wateja wengine wazidi kutumia kadi, wazidi kuchanja uwezi jua labda kadi yako ndio safari yako"

 

Evelyne ameongeza kuwa ushindi huo umetokana na kufanya malipo kwa kutumia kadi badala ya fedha taslimu katika manunuzi mbalimbali ndani na nje ya nchini.

Washindi wa kampeni hii watalipiwa nauli ya safari yao ya kwenda Abidjan, malazi katika hoteli ya kifahari, tiketi za daraja la juu (VIP) za kushuhudia mchezo wa fainali, kuhudhuria matukio maalum na vingine vingi ambavyo vitawaachia kumbukumbu isiyofutika.

Mbali na kushinda safari hiyo, wateja watakuwa na fursa ya kushinda zawadi nyingine ikiwemo seti ya sofa na vifaa vya kielektroniki mfano runinga na friji. Ili kushinda, amesema wateja wanaweza kutumia kadi zao kulipia bidhaa wanapozinunua dukani au sokoni, kwenye vituo vya mafuta, hotelini, wanaponunua tikiti au kulipia huduma.