SIM CARD AMBAZO HAZIJASAJILIWA MWISHO KUTUMIKA JUNI MOSI

Na Mwandishi wetu

MKURUGENZI Mkuu wa  Mamlaka ya Mawasiliano Tanzania, Profesa John Nkoma, amewataka watumiaji wa simu za mkononi kuhakikisha wanazisajili zimu zao kabla ya Julai 10 mwaka huu kinyume chake zitafungwa.

Taarifa iliyosambazwa kwa vyombo vya habari na kusainiwa na Mkurugenzi huyo, ilisema, pia Juni Mosi mwaka huu saa sita usiku laini zote za simu ambazo hazijaanza kutumika zitafungwa na hazitaruhusiwa kutumika hadi mtumiaji atakapoisajili laini yake mpya na watoa huduma husika.

Profesa Nkoma alisema watumiaji wa simu hizo na wananchi wanashauriwa kuunga mkono juhudi zinazofanyika ili kufanikisha usajili huo wa namba za simu kwa ajili ya kudumisha na kuendeleza amani, usalama na kuharakisha maendeleo ya sekta ya mawasiliano na Taifa kwa ujumla.

Alisema ili kusajili namba hizo mtumiaji anapaswa kwenda kwa mtoa huduma wake au wakala akiwa na kitambulisho chenye picha yake, kutoa taarifa sahihi.

Profesa Nkoma alisema Sheria ya mawasiliano ya kielektroniki na Posta (EPOCA), ya mwaka 2010, kifungu cha 131, kimeainisha kuwa ni kosa la jinai kutumia au kuwezesha kutumika namba ya simu isiyosajiliwa.

Aliongeza kuwa adhabu ya kosa hilo ni faini ya sh 500,000 au kifungu cha miezi mitatu ambayo itatolewa kwa yeyote atakayekiuka sheria hiyo.

Aidha, iwapo umesajili simu yako, mamlaka inakushauri kuthibitisha usajili huo kwa kupiga *106#, kama wewe ni mtumiaji wa huduma zilizoko kwenye mfumo wa GSM (Vodacom, Airtel, MIC (Tigo) na Zantel), kwa wateja wanaotumia huduma za mfumo wa CDMA (Biol, SASATEL, TCCL Mobile na Zantel Data), watapiga namba 106 ambapo watasikiliiza maelekezo.

“Taarifa utakayoipata inatakiwa kutaja jina lako kama mtumiaji halali wa namba husika, na iwapo utapata jibu tofauti, tafadhali fika kwenye ofisi ya mtoa huduma wako au wakala wake ili kurekebisha kasoro hizo”alisema Profesa Nkoma.