TAIFA STARS YAINGIA KAMBINI KUJIWINDA NA WAMOROCCO

Kikosi cha Taifa Stars

DAR ES SALAAM, Tanzania

Wakati huo huo; Shirikisho la Soka Duniani (Fifa), limemteua mwamuzi wa kimataifa wa Tanzania, Leslie Liunda, kuwa mtathimini wa waamuzi (referee assessor) wa mechi ya kuwania kufuzu fainali hizo za Brazil mwakani, kati ya vibonde wa kundi Cape Verde na Equatorial Guinnea

WACHEZAJI 24 wa timu ya Taifa ya Tanzania ‘Taifa Stars,’ wameingia kambini jana jioni na leo asubuhi kuanza mazoezi ya kujiandaa na mechi ya kuwania kufuzu Kombe la Dunia 2014 dhidi ya Morocco itakayopigwa Juni 8, mjini Marakesh, nchini Morocco.

Akizungumza jijini Dar es Salaam leo, Ofisa Habari wa Shirikisho la Soka Tanzania (TFF), Boniface Wambura, nyota wote wameitikia mwito wa kambi hiyo na kwamba jana walianza mazoezi kwenye Uwanja wa Karume, chini ya Kocha Mkuu, Kim Poulsen.

Alisema kuwa, kambi hiyo itaendelea kwa wiki mbili kuelekea mechi hiyo kwenye dimba la Stade de Marrakech, ambayo kabla yake Stars itacheza kirafiki dhidi ya Sudan jijini Adis Ababa, Ethiopia Juni 2 kama ilivyoelezwa na Poulsen alipotangaza kikosi.

“Sisi kama TFF tumefurahishwa na mwitikio wa wachezaji, kuwapo kwao kambini kwa wakati mmoja, kutampa kocha Poulsen wigo mpana wa kuwanoa kujua nani na nani wako katika kiwango kizuri kupeperusha bendera ya taifa,” alisema Wambura.

Wakati huo huo; Shirikisho la Soka Duniani (Fifa), limemteua mwamuzi wa kimataifa wa Tanzania, Leslie Liunda, kuwa mtathimini wa waamuzi (referee assessor) wa mechi ya kuwania kufuzu fainali hizo za Brazil mwakani, kati ya vibonde wa kundi Cape Verde na Equatorial Guinnea.