UZINDUZI WA ALBAMU YA THAMANI YETU LEO KUFANYIKA JUNI 6

NA ZAWADI CHOGOGWE

ASASI isiyokuwa ya kiserikali ya Women In Society (WOISO), katika kuadhimisha siku ya Watoto Duniani Juni 6 mwaka huu inatarajia kuzindua  Albamu  zenye ujumbe wa watoto katika uzinduzi utakaofanyika katika viwanja vya  Kijitonyama.

Sambamba na uzinduzi huo, wenye kauli mbiu  ya ‘Thamani Yetu Leo’kutakuwa  na burudani mbalimbli zikiwemo ngoma za asili,sarakasi na maigizo.

Akizunguza na wanahabari jijini Dar es Salaam leo ,Mwenyekiti wa nidhamu wa asasi hiyo, Zenais Mtebe,alisema kuwa watakaohudhuria katika uzinduzi huo wataelimika na ujumbe utakaotolewa katika uzinduzi wa albamu hiyo na kupata burudani ya pekee kutoka kwa wasanii mbalimba wazoefu na chupukizi.

Alisema mbali na burudani hizo kutakuwa na elimu namna ya kuwasaidia watoto ambao wanafanyiwa vitendo vya ukatili.

Aliongeza kuwa uzinduzi huo utatumika kusambaza machapisho mbalimbali ya kuelimisha jamii ambapo wataanzia na mikoa ya  Pwani ,Tanga,Morogoro, Mbeya na Mwanza.

Mtebe alisema Mgeni rasmi katika uzinduzi huo anatarajiwa kuwa  Mkurugenzi Mtendaji  wa Chama cha Afya na Uzazi  na Malezi Bora (UMATI), Lulu Mwanakilala.

Naye Mwenyekiti wa Bodi , Juliana Madeleke, alitoa wito kwa wazazi kuwapeleka kwa wingi watoto katika uzinduzi huo kwa lengo la kujifunza elimu itakayotolewa katika uzinduzi wa albamu hiyo.

“Jamii ya sasa imekua ikipoteza maadili ya kitanzania na badala yake imewasahau watoto katika misingi ya kupenda zaidi utandawazi ambao umeharibu misingi imara ya jamii kwa kutokana mazingira ya huko, hivyo wazazi walateni watoto wajifunze maadili mema na nyimbo zenye ujumbe mzuri kwa taifa la Tanzania” alisema.