MAKAMU WA RAIS KUFUNGUA MAONESHO YA SABASABA JULAI 2, 2019

 Waziri wa Viwanda na Biashara, Innocent Bashungwa, akizungumza na waandishi wa habari leo katika viwanja vya Sabasaba jijini Dar es Salaam.

Na Tatu Mohamed

MAKAMU wa Rais, Samia Hassan Suluhu anatarajia kufungua rasmi kesho maonyesho ya 43 ya Kimataifa ya Biashara maarufu kama  Sabasaba yaliyoanza Juni 28 mwaka huu na yanatarajia kumalizika Julai 13, mwaka huu.

Maonyesho hayo ambayo ni ya siku 10 huvuta zaidi ya watu 350,000 na ni moja ya fursa bora ya kupanua biashara ambayo hutoa nafasi ya kuwasiliana moja kwa moja na wateja waliopo na wapya, pia ni jukwaa la kulinganisha bidhaa na huduma zinazohusiana zenye ushindani.

Akizungumza na waandishi wa habari leo Julai 1, 2019 jijini Dar es Salaam viwanja vya katika maonesho hayo, yenye kauli mbiu ya 'Usindikaji wa Mazao ya Kilimo kwa Maendeleo ya Viwanda', Waziri wa Viwanda na Biashara, Innocent Bashungwa amesema maonesho ya mwaka huu yatakuwa tofauti na miaka ya nyuma.

"Tofauti ni kwamba sabasaba ya mwaka huu tunataka iwe jukwaa la kujipambanua katika uchumi funganishi wa viwanda. Sabasaba ndo tunataka iwe fursa ya kuwakutanisha watu mbalimbali," amesema.

Ameongezea kuwa katika siku yenyewe ya sabasaba ambayo  huadhimishwa Julai 7, kila mwaka kutakuwa ni siku maalumu ya mazao ya kimkakati.

Amebainisha kuwa kwasasa jumla ya nchi 35 zimeshiriki maonesho haya, huku taasisi na kampuni za ndani zikiwa 3250.