SERIKALI YAHITAJI WAZALISHAJI BIDHAA ZA VIUNGO Inbox x

Na Tatu Mohamed, Dar es Salaam

SERIKALI  imesema bado  bidhaa za viungo na zile zitokanazo na zao la mwani  zinazozalishwa  nchini  hazina ubora stahiki jambo linalosababisha  wazalishaji kushindwa kuzipeleka  katika masoko  mbalimbali  ndani  na nje ya nchi. 

Pia imesema mdalasini wa Tanzania unahitajika sana duniani,  kutokana na kutokuwa na kiwango cha kemikali na kuwataka wananchi kuchangamkia  fursa  hiyo. 

Kadhalika zao  la Iliki linahitajika kwa wingi  Pakstani ambapo  soko  lake  kubwa Kimataifa. 

Waziri  wa  Viwanda  wa Serikali  ya Mapinduzi Zanzibari, Balozi Amina  Salum  Ali amesema  hayo katika siku  maalum ya bidhaa  za viungo na mwani katika  maonesho  ya 43 ya biashara ya Kimataifa yanayoendelea  katika viwanja  vya Mwalimu Nyerere barabara ya Kilwa. 

Amesema kilimo cha mazao  ya viungo kina  tija  na kimekuwa  kuwalipa sana na kuhimiza  wazalishaji  kutumia fursa  hiyo  kuzalisha bidhaa  zenye  ubora. 

"Ni vyema wazalishaji kutumia teknolojia ya kisasa, pia vyombo  vya taifa  kuangalia teknolojia rahisi ya kutumia  yenye  kuwasaidia wananchi.

"Pia nahimiza kuwepo  kwa ubunifu katika  kutengeneza bidhaa zinazotakiwa na hata kuwa  na vifungashio  imara  na bora ili kumudu  soko la ndani na nje  ya nchi," amesema.

Awali akizungumza katika siku hiyo, Mkurugenzi wa Tantrade, Edwin Rutageruka amesema zipo  fursa  mbalimbali  za uzalishaji wa bidhaa  za  viungo na kuwataka  wazalishaji kushirikiana na Mamlaka  hiyo  ili  kuweza kufika  mbali. 

Amesema  wapo  baadhi ya wafanyabiashara  ambao  sio  wakweli  wakiahidi  kusambaza  bidhaa  katika masoko  ya kimataifa lakini  wakiwa  hawawezi  kufanya  hivyo.