WANAFUNZI MUHAS WAFANYA ZIARA YA MAFUNZO TUME YA NGUVU ZA ATOMIKI TANZANIA

Wanafunzi wa Chuo Kikuu MUHAS wakiwa katika picha ya pamoja baada ya kufanya ziara ya kujifunza Makao Makuu ya Tume ya Nguvu za Atomiki Tanzania (TAEC).

Mionzikutembelea Arusha, 09 Julai, 2019 
Wanafunzi 32 wa mwaka wa tatu wa  Chuo Kikuu cha Afya cha Muhimbili (MUHAS) Jumatatu tarehe 08 Julai, 2019 walifanya ziara ya mafunzo Makao Makuu ya  Tume ya Nguvu za Atomiki Tanzania (TAEC) yaliyopo Njiro, Jijini Arusha.

Lengo la ziara hiyo  ya siku moja (1) lilikuwa ni kujifunza matumizi mbalimbali ya teknolojia ya nyuklia yanayofanyika hapa nchini pamoja na udhibiti wake.

Bw. Didas Shao ambaye ni Mtafiti  wa masuala ya mionzi sehemu za kazi, amesema kuwa  wanafunzi hao wameweza  kujifunza  juu ya matumizi  mbalimbali  ya teknolojia  ya  Nyuklia inavyotumika hapa nchini katika sekta za viwanda, kilimo, mifugo, ujenzi, maji, migodi pamoja matumizi ya teknolojia hiyo katika sekta  ya afya, sanjari na udhibiti wake ili kutokuleta madhara kwa wagonjwa, wananchi pamoja  na mazingira.

Wanafunzi hao pia waliweza kujifunza namna ya kukabiliana na majanga yanaohusiana na teknolojia  ya nyuklia na kuweza kujua sheria mbali mbali zinazosimamia teknolojia hiyo hapa nchini.

TAEC inaendelea   kuwakaribisha wadau mbalimbali, wananchi na wanafunzi katika ngazi zote za elimu hapa nchini kuanzia shule za msingi, sekondari na vyuo vya elimu ya juu ili kufika katika ofisi zake zote zilizopo hapa nchini ili kuendelea kujipatia elimu juu ya udhibiti wa matumizi salama ya mionzi na uhamasishaji, uendelezaji wa matumizi salama ya teknolojia ya nyuklia hapa nchini.

Imetolewa na;

Kitengo cha Mawasiliano

Tume ya Nguvu za Atomiki Tanzania