NMB YACHANGIA UJENZI UWANJA WA CHATO

 Meneja wa Benki ya NMB Kanda ya Ziwa, Abraham Augustino (wa pili kushoto), akimkabidhi matofali Mkuu wa Wilaya ya Chato Mhandisi, Charles Kabeho, kwa ajili ya ujenzi wa uwanja wa mpira wa miguu wa Chato. Kulia ni Mwenyekiti wa Halmashauri hiyo, Batholomeo Manunga. Hafla hiyo ilifanyika katika ofisi ya za mkuu wa wilaya Chato hivi karibuni. (Na Mpiga Picha Wetu).

Na Mwandishi Wetu

  

KATIKA kuunga mkono mchakato wa ujenzi wa Uwanja wa Soka wa Chato, unaojengwa mjini Chato mkoani Geita, Benki ya NMB imekabidhi msaada wa vifaa vya ujenzi vyenye thamani ya Sh. Mil. 30.

Vifaa vilivyokabidhiwa ni pamoja na mifuko ya saruji 500 na matofali 13,335, huku NMB ikiahidi kuangalia uwezekano wa kutoa misaada zaidi katika siku za usoni ili kufanikisha ukamilifu wa ujenzi huo.

Akizungumza wakati wa hafla ya makabidhiano ya msaada huo mwishoni mwa wiki iliyopita, Meneja wa Benki ya NMB Kanda ya Ziwa, Abraham Augustino, alisema msaada huo ni uthibitisho wa namna benki yake inavyothamini michezo katika kuimarisha afya ya watu, hasa vijana.

"Msaada huu ni sehemu tu ya utaratibu wa kila mwaka wa benki hii katika kuunga mkono miradi ya maendeleo kupitia Kitengo cha Uwajibikaji kwa Jamii (CRS), ambao umeifanya NMB kutoa zaidi ya Sh. Mil. 900 hadi sasa kati ya fungu la Sh. Bil. 1 iliyotengwa mwaka huu kusaidia jamii kote nchini," alisema Augustino.

Waakipokea msaada huo, Mkuu wa Wilaya ya Chato (DC), Charles Kabeho na Mkurugenzi (DED) wa wilaya hito, Eliud Mwaiteleke, waliishukuru NMB kwa kujitokeza kusaidia harakati za maendeleo ya michezo wilayani mwao.

DC Kabeho alisema kuwa, ujenzi wa uwanja huo ni sehemu ya mpango unaolenga kuamsha ari ya maendeleo ya michezo wilayani humo, sawa na ilivyo miradi mingine ya kimkakati inayoratibiwa katika wilaya hiyo.

Kwa upande wake, DED Mwaiteleke alisema ujenzi wa uwanja huo unaokadiriwa kuingiz watazamaji 3,000, utakuwa chachu ya maendeleo ya michezo, na kwamba miamba ya soka nchini kama Simba, Yanga, Azam FC na wengineo, siku moja watakuja kutumia dimba hilo watakapokuwa katika safari za mechi za Ligi Kuu.

"Tunatarajia kuwa wenhyeji wa miamba ya soka kama Simba na Yanga, wakati zitakapoamua kuweka kambi huku, ama watapotembelea wakati wa mechi za Ligi Kuu. Wito wangu kwa mashabiki wa soka wilayani Chato, kujiunga na huduma za NMB na kuipa nguvu ya kutusapoti katika ujenzi wa uwanja huu," alisema Mwaiteleke.