WANANCHI WAMLILIA LUKUVI WAPATIWE SHAMBA LA MWEKEZAJI KILOSA

Waziri wa Ardhi, Nyumba na Maendeleo ya Makazi, William Lukuvi, akizungumza na wananchi wa Kijiji cha Magomeni Wilaya ya Kilosa mkoani Morogoro (hawapo pichani), alipokwenda kusikiliza malalamiko ya wakazi hao kuhusiana na shamba la Mwekezaji Farm Africa Agro Focus Ltd. Kushoto ni  Mkuu wa Wilaya ya Kilosa, Adam Mgoyi. (Picha na Wizara ya Ardhi)

 Na Munir Shemweta, WANMM KILOSA

Wananchi wa Kijiji cha Magomeni kilichopo tarafa ya Kilosa Mjini wilayani Kilosa mkoani Morogoro wametoa kilio chao kwa Waziri wa Ardhi, Nyumba na Maendeleo ya Makazi, William Lukuvi, wakitaka kupatiwa shamba la Mwekezaji Farm Africa Agro Focus Ltd marufu kama 'Kwa Karamagi,' kwa madai kuwa mwekezaji wa shamba hilo ameshindwa kuliendeleza.

Wananchi hao wamemueleza Lukuvi kuwa, kijiji hicho hakina ardhi ya kutosha kuwawezesha kujishughulisha na kilimo na kwamba eneo kubwa katika kijiji hicho ni la shamba la Farm lenye ukubwa wa ekari 13,000.

Wananchi hao walitoa kilio chao kwa Waziri Lukuvi, Novemba 8, 2019, wakati waziri huyo akiwa katika ziara yake wilayani Kilosa kuendelea na jitihada za kutatua migogoro ya ardhi katika mkoa wa Morogoro.

Wamedai kuwa pamoja na mwekezaji kuwa na eneo kubwa, lakini ameshindwa kuliendeleza kama taratibu zinavyotakiwa na badala yake sehemu kubwa ya shamba hilo imebaki kuwa pori ingawa limeendelezwa katika eneo la usoni.

Mmoja wa wananchi hao Ismail Masudi alimueleza Waziri Lukuvi kuwa wananchi wa kijiji hicho wamekuwa wakiishi kwa hofu kubwa kutokana na mgogoro wa muda mrefu kati ya mwekezaji na wananchi hao.

‘’Wananchi tumepiga kelele sana ya kusaidiwa, Mwekezaji ana eneo kubwa, lakini wananchi wanakosa maeneo ya makazi na ya kufanyia shughuli za kilimo, huku sehemu kubwa ya shamba la mwekezaji ikiwa ni pori,’’ alisema Masudi

Mwananchi mwingine Hatibu Musa alisema kilio kikubwa cha wakazi wa kijiji hicho ni eneo la kulima, wakati idadi ya wakazi inaongezeka na wananchi wamehangaika kwa takriban miaka mitano na mgogoro huo, huku wakidai mwekezaji hana tija.

Kwa upande wake Waziri Lukuvi alimtaka Mkuu wa Wilaya ya Kilosa, Adam Mgoyi, kumuomba mwekezaji wa shamba hilo kupunguza ekari 3000 kati ya 13,000 alizokuwa nazo kwa ajili ya kuwapatia wananchi wa kijiji cha Magomeni.

"Badala ya kuanza kufuta shamba, Mwekezaji arudishe ekari 3000 kati ya 13,000 alizokuwa nazo tunataka kasi ya uendelezaji iendelee maana haiwezekani miaka nane ni ekari 2000 tu zilizoendelezwa,’’ alisema Lukuvi.

Alisema, haingilii maamuzi ya mahakama yaliyompa ushindi Mwekezaji na wala hataki wananchi kupingana na maamuzi ya mahakama, bali hali hiyo inafuatia mwekezaji  kushndwa kuliendeleza shamba kama taratibu zinavyotakiwa ambapo uendelezwaji unatakiwa kufanyika moja ya nane kila mwaka jambo alilolieleza mwekezaji huyo alishindwa kutekeleza.

Taarifa kuhusiana na shamba hilo zinaeleza kuwa Mwekezaji wa sasa Farm Africa Agro Focus alikabidhiwa shamba mwaka 2013 hadi kufikia sasa ni ekari 2000 pekee kati ya 13,000 ndizo zilizoendelezwa kwa kulima zao la Korosho.