SIKONGE YAKUSANYA SHILINGI BILIONI 1.835 KATIKA MWAKA WA FEDHA 2018/19

Na Tiganya Vincent

HALMASHAURI ya Wilaya ya Sikonge imefanikiwa kukusanya kiasi cha shilingi bilioni 1.835 katika mwaka wa fedha ulimazikia Juni 2019.

Kiasi hicho cha fedha ni sawa na asilimia 87.12 ya lengo la kukusanya shilingi bilioni 2.106 waliokusudia kukusanya hadi kufikia Juni 2019.

Kauli hiyo imetolewa juzi na Mkurugenzi Mtendaji wa Halmashauri ya Wilaya ya Sikonge Martha Luleka wakati akiwasilisha taarifa ya utekelezaji wa mpango na bajeti ya mwaka 2018/19.

Alisema kati ya fedha zilizokusanywa kiasi cha shilingi bilioni 1.354 zilitengwa kwa ajili ya matumizi ya kawaida na milioni 480.4 zilipelekwa katika shughuli za miradi ya maendeleo.

Luleka alisema kuwa hatua za kinidhamu zilichukuliwa kwa watumishi waliosababisha kutofika malengo ya kukusanya kwa asilimia 100 ikiwa ni pamoja na kushindwa kuwasilisha mapato.

Alisema hatua hizo zilisaidia baadhi ya watumishi kuanza kurejesha fedha za mapato ambazo walikuwa hawajizipeleka Benki.

Akizungumza baada ya kupokea taarifa hiyo , Mwenyekiti wa Halmashauri ya Sikonge Peter Nzalalila aliwataka Madiwani kushirikiana na watumishi katika Kata zao katika kuhakikisha wanakusanya mapato yote waliyojiwekea kulingana na malengo ya Halmashauri.

Aidha aliwataka watumishi waliokabidhiwa jukumu la ukusanyaji mapato ya Halmashauri ya Sikonge kuhakikisha kila wanapokusanya fedha wanaziwakilisha kwenye akaunti za Halmashauri zinahusika na mapato.

Alisema ni marufuku Mtumishi kukaa na fedha kwake pindi anapokuwa ameshakusanya na kuongeza hatua itawasaidia kuwaondoa katika matatizo ya kupoteza na wakati mwingine kutumia fedha hizo kinyume cha utaratibu.