CORONA IMETUPA FUNZO-WAZIRI MKUU

Waziri Mkuu, Kassim Majaliwa akizungumza wakati alipofungua Maonyesho ya 44 ya Biashara ya Kimataifa ya  Dar es Salaam , Barabara ya Kilwa jijini Dar es salaam, Julai 3, 2020. (Picha na Ofisi ya Waziri Mkuu).

NA TATU MOHAMED

WAZIRI Mkuu Kassim Majaliwa amesema  janga la ugonjwa wa Corona imeipa funzo serikali kuimarisha sekta muhimu ikiwemo kilimo ili kuzalisha chakula cha kutosha na cha ziada katika masoko.

Waziri Majaliwa ametoa kauli hiyo leo Julai 3, 2020 wakati akifungua Maonyesho ya 44 ya Kimataifa ya Biashara  (sabasaba), ambapo amesema kuwa serikali imejidhatiti kuweka mazingira mazuri ya biashara na kuboresha masoko ya bidhaa za ndani na kuvutia wawekezaji ili kukuza uchumi 

"Tunatambua mchango wa sekta  binafsi, viwanda, kilimo na washiriki wa mnyororo wa thamani na wataalamu walioshiriki katika maonyesho haya katika kukuza uchumi," amesema.

Ameongeza kuwa maonyesho hayo yatachochea kubadilishana uzoefu katika sekta ya baishara na kuendelea kuhamasisha ukuaji wa uchumi wa kati.

"Pamoja na kuwapo kwa janga la Corona maonyesho haya yamefana na sekta ya viwanda na biashara zinaendelea kuimarika. Natambua kuna mikutano ya ana kwa ana katika maonyesho haya, ambayo yatawajengea uwezo washiriki, kupanua wigo wa masoko na fursa kwa wafanyabiashara," amesema.

Pia Waziri Majaliwa, ametoa wito kwa wazalishaji wa mazao kutafuta masoko ya uhakika.

Mwenyekiti wa Bodi ya Wakurugenzi wa Mamlaka ya Maendeleo ya Biashara Tanzania (TanTrade), Dk Ng’wanza Kamata amesema baada ya kuambiwa muda mchache juu ya uwepo wa Maonesho nayo waliweza kujipanga na kuhakikisha maandalizi yanaenda vizuri

"Kutokana ugonjwa huu wa Corona  hata  sisi tulikuwa tumehisi kuwa maonyesho haya hayatakuwepo hadi pale ambapo tuliambiwa yatakuwepo na tulikuwa na muda mchache wa maandalizi na tumeweza kufanya hiki tulichokifanya,” amesema na kuongeza

" Kwa mwaka huu washiriki waliohudhuria sio wengi sana ukilinganisha na mwaka Jana hususani Kampuni za nje na tunajua sababu ambazo zimefanya zisishiriki," amesema.