Yanga kuupa heshima mchezo wa Ngao ya jamii

NA ABDALLAH HIJA

 
UONGOZI wa Mabingwa wa Kihistoria wa Ligi Kuu Tanzania Bara (VPL) Yanga SC , umefunguka kuwa unaangalia namna ya kusogeza muda kwenye michezo yao itakayopamba kilele cha wiki ya Wananchi ili kuupa heshima mtanange wa ngao ya jamii.

Mchezo huo wa ngao ya jamii utakaopigwa saa 9 alasiri, Agosti 30 mwaka huu, utakaowakutanisha Simba SC dhidi ya Namungo Uwanja wa Sheikh Amri Abeid jijini Arusha, utaambatana na shughuli ya kilele cha wiki ya Wananchi itakayofanyika Dimba la Benjamin Mkapa jijini Dar es Salaam.

Kwa mujibu wa Ofisa Habari wa Yanga Hassani Bumbuli michezo katika wiki ya wanachi itachezwa mara baada ya kumalizika ule wa ngao ya jamii huku mechi iliyokuwa ikisubiliwa kwa hamu Kati ya Yanga dhidi ya Aigle Noir ya Burundi itapigwa saa 1 jioni.

Bumbuli alisema, kwa kuheshimu ufunguzi wa ligi kwa mchezo wa ngao ya jamii wanajaribu kusogeza ratiba yao kwa muda ule wa saa tisa na hadi dakika 90 zinakamilika kusiwepo na mechi yeyote. 

“Tunajaribu  kutoa heshima kwa mchezo wa ufunguzi ili kuheshimu pazia la ligi linafunguliwa, tutajaribu kuangalia uwezekanao wa kufanya hivyo vitu vingine tutajaribu kuangalia hapo baadae,” alisema Bumbuli.