Mawakala wa Bima waombwa kutoa elimu ya kutosha kwa wananchi kufikia malengo ya Serikali

Kamishna wa Bima Nchini Dkt. Mussa Juma.

 Wadau wa Bima.

 

Hussein Ndubikile, Dar es Salaam

Kamishna wa Bima Nchini Dkt. Mussa Juma amewataka Mawakala wa Bima Nchini kuhakikisha wanatoa elimu ya kutosha kwa wananchi kuhusu umuhimu wa bima ili kufikia malengo ambayo Serikali imejiwekea ikiwemo kufikia asilimia 80% ya uelewa wa bima kwa wananchi,huku akibainisha  angalau asilimia 50 ya Watanzania wawe wamepata Bima mojawapo kufikia mwaka 2030.

Kamishna Mussa ametoa wito huo jijjini Dar es Salaam wakati akifungua Mafunzo ya siku mbili yaliyoandaliwa na Umoja wa Chama Cha Mawakala wa Bima Nchini ambayo yamelenga kutoa elimu juu ya namma Bora ya kuendesha uwakala,kutafuta masoko pamoja na kufahamu mambo ya kodi kuhusu Bima hatua ambayo itawasaidia wakala hao kufanya kazi kwa ufanisi mkubwa.

Kamishna  huyo wa Bima kutoka ya Mamlaka ya Usimamizi wa Bima Nchini ( TIRA) amesema kwamba ili kufikia malengo hayo ni muhimu mawakala,madalali pamoja na makampuni ya Bima kuendelea kutoa elimu kwa wateja, kuuza bidhaa za Bima kulingana na uwezo wa kampuni zao pamoja na kushughulikia na kutatua haraka migogoro ya Bima inayojitokeza kwa wateja wao.

"Kujiendeleza kielimu inasaidia kuwa nauelewa mpana katika masuala ya Bima hususani mambo ya teknolojia na hii inawasaidia msiachwe nyuma kwenye ushindani,hivyo jitahidini Kila mmoja awe na kitu cha kipekee ili unaeshindana nae asiweze kukushinda ,kwahiyo mnapata semina hii kuwafanya msitupwe kwenye ushindani"amesema.

Mwenyekiti wa Umoja wa Chama Cha wakala wa Bima Nchini  Sayi Daudi ameiomba serikali kuondoa sharti la kuwekea kiwango cha fedha benki (FDR) ambacho kitatumiwa na wakala kulipa gharama za bima pindi atakapokutana na changamoto za kutenda nje ya utaratibu  kwa mteja wake nakwamba sharti hilo limekuwa kikwazo Kwa wakala wa bima ambao ni wapya.

" Tunaiomba serikali iondoe hiki kigezo  kinachomtaka mtu anaetaka kutoa huduma za bima lazima awe na kiasi fulani cha fedha benki ambacho kinaweza kutumika kumlipa mteja anaetendewa kinyume cha utaratibu, jambo hili limekua kikwazo kikubwa Kwa wakala wa  bima,tunaiomba ikiwezekana waiondoe " amesema Sayi ambaye pia ni Mkurugenzi wa Kampuni ya Bima ya FIDES Insurance iliyopo Dar es salaam.

Kwa upande wao baadhi ya viongozi watendaji wa  makampuni ya wakala wa Bima akiwemo  Bi.Modesta Liviga wa Kampuni ya Primode Insurance Agency. pamoja na Bw.Meshack Matulile Mtendaji Mkuu wa Kampuni ya  BMC Insurance Agency wamesema kwa nyakati tofauti kuwa mafunzo hayo yatawasaidia kufahamu namna bora ya kuuza bidhaa za bima, kutafuta Masoko ya Bima hatua ambayo itasaidia kufanya kazi zao Kwa ufanisi mkubwa.