NA DENIS MLOWE, IRINGA
MBUNGE wa Jimbo la Iringa Mjini, Fadhili Ngajilo, ameendelea kudhihirisha dhamira yake ya kuwainua vijana kiuchumi kwa kutekeleza ahadi ya kuwawezesha kujiajiri kupitia mafunzo ya ujasiriamali pamoja na kuwaunganisha na fursa za mitaji.
Kauli hiyo ameitoa wakati akitangaza kufanyika kwa semina ya pili ya ujasiriamali itakayowakutanisha vijana wa jimbo hilo kwa lengo la kuwajengea uwezo wa kuanzisha na kuendesha biashara zenye tija.
Ngajilo amesema kuwa wakati wa kampeni aliahidi kuwa njia bora ya kumkomboa kijana ni kumsaidia kujitegemea kiuchumi badala ya kutegemea ajira rasmi ambazo ni chache.
Ameeleza kuwa semina hiyo inalenga kuwapa vijana maarifa ya kina katika sekta mbalimbali za biashara ili waweze kubuni fursa, kuzitumia ipasavyo na hatimaye kuchangia maendeleo ya jamii na taifa kwa ujumla.
Aidha, mbunge huyo amebainisha kuwa semina hiyo itahusisha ushiriki wa taasisi mbalimbali za kifedha zitakazotoa elimu ya mikopo na huduma za kifedha pamoja na mikopo yenye riba nafuu kwa vijana. Hatua hiyo inalenga kupunguza changamoto ya upatikanaji wa mitaji ambayo imekuwa kikwazo kikubwa kwa vijana wengi wenye ndoto za kuanzisha biashara lakini kukosa rasilimali za kuanzia.
Ameongeza kuwa kupitia mpango huo, vijana watapata nafasi ya kujifunza mbinu za kisasa za ujasiriamali, usimamizi wa fedha, pamoja na matumizi ya teknolojia katika kukuza biashara zao.
Pia amesisitiza kuwa serikali inaendelea kuweka mazingira rafiki kwa vijana kujiajiri na kushiriki kikamilifu katika uchumi wa nchi.
Kwa upande wake, Ngajilo ametoa wito kwa vijana wote wa Iringa Mjini kujitokeza kwa wingi kushiriki katika semina hiyo ili kunufaika na fursa zilizopo.
Amesema mafanikio ya taifa yanategemea juhudi na ubunifu wa vijana, hivyo ni muhimu kwao kutumia kikamilifu nafasi wanazopewa ili kujenga maisha bora ya sasa na ya baadaye.
Baadhi ya vijana waliopata taarifa ya semina hiyo wameeleza matarajio yao makubwa, wakisema kuwa mafunzo hayo yatawasaidia kubadilisha mitazamo na kuwapa mwanga mpya wa kujiajiri.
Wamepongeza juhudi za mbunge wao wakisisitiza kuwa mipango hiyo inaweza kuwa chachu ya kupunguza tatizo la ukosefu wa ajira miongoni mwa vijana.
Wataalamu wa masuala ya uchumi wameeleza kuwa uwekezaji katika mafunzo ya ujasiriamali ni moja ya njia muhimu za kukuza uchumi wa ndani, hasa katika maeneo ya mijini yanayokua kwa kasi kama Iringa. Wameshauri juhudi hizo ziendelezwe kwa muda mrefu ili kuhakikisha zinatoa matokeo endelevu kwa kizazi cha sasa na kijacho.
No comments:
Post a Comment