MAMLAKA YA MAJISAFI NA MAZINGIRA (AUWSA) YAWATOA HOFU WAKAZI WA ARUSHA KUHUSU TAARIFA YA KUCHAFULIWA KWA MAJI YAKE

 

Na Dixon Busagaga wa Globu ya Jamii ,Kanda ya Kaskazin

MAMLAKA ya Maji safi na Mazingira  Arusha (AUWSA) imewatoa hofu wakazi wa jiji la Arusha na maeneo inayotoa huduma juu ya uvumi wa taarifa ya kuchafuliwa kwa maji ama kuchanganywa na  Majitakana kwamba taarifa hizo si za kweli  . 

Kwa mujibu wa taarifa iliyotolewa na Afisa Uhusiano na Umma wa Mamlaka ya Mazingira na Majitaka Arusha ,William Shayo ameeleza kuwa tayari hatua mbalimbali zimechukuliwa ikiwa ni pamoja na kufanya uchunguzi wa kina juu ya taarifa hiyo.

“Auwsa imechukua hatua za kufanya uchunguzi wa kina ikiwahusisha wataalamu wa Maabara ya Maji mkoani  Arusha,Sampuli  za maji zilichukuliwa kutoka katika maeneo mbalimbali yaliyo ripotiwa  kwa kuzingatia muongozo wa uchukuaji sampuli za maji”alisema Shayo.

Alisema Sampuli hizo zilipimwa katika maabara ya mkoa ya Wizra ya maji na matokeo ya uchunguzi wa sampuli hizo umeonyesha kuwa  huduma ya maji inayotolewa na Mamlaka hiyo ni safi na yana dawa ya kutosha.

Mkurugenzi Mtendaji wa AUWSA , Luth Koye.

“Kwa tahadhari Auwsa vile vile tumeamua kufanya Flushing (kusafisha)   ya mfumo mzima wa majisafi  kwa  sehemu maalumu zilizopo kwenye mtandao ,ambazo zilisanifiwa kwa ajili ya kazi hiyo.”alisema Shayo.

Shayo alisema Auwsa pia imeendelea kuchukua sampuli katika maeneo mengine kwa kadri wanavyopokea taarifa na kwamba vipimo  vya sampuli hizo vimeonesha maji hayo ni safi na yana dawa ya kutosha.

Mbali na uchukuaji wa Sampuli na ufanyaji wa vipimo ,Shayo alisema Auwsa imetembelea maeneo mbalimbali ambayo kumekuwa na taarifa za uwepo wa maji hayo na kutoa elimu juu ya uhifadhi salama wa maji kwa matumizi salama.

Aidha Shayo alisema kwa yoyote mwenye taarifa zaidi kuhusu uvumi ulioenezwa kwenye mitandaoo ya kijamii awasiliane na Mamlaka ya Majisafi na Mazingira  Arusha (AUWSA) kupitia namba 0800110069 ambazo ni bure au 0755900693.