PROGRAMU YA VISOMO YAWAWEZESHA WAHITIMU 208 - VETA

Na Tatu Mohamed

JUMLA ya wanafunzi 208 wamehitimu mafunzo ya mfumo wa kutumia Mtandao kupitia maombi ya 'Visomo' yanayotolewa na Chuo cha Kipawa jijini Dar es Salaam kilichopo chini ya Mamlaka ya Elimu ya Mafunzo ya Ufundi Stadi (VETA).

Mfumo huo unaopatikana bure  kupitia programu ya Visomo unamuwezesha mwanafunzi kusoma kupitia picha pamoja na maandishi na baadae kufanya mtihani.

Akizungumza katika maonesho ya 43 kimataifa ya biashara ya Dar es salaam (DITF), yanayofanyika katika viwanja vya Mwalimu Julius Nyerere, Mratibu wa mradi wa Visomo Charles Mapuli (pichani),  amesema katika mfumo huo wa visomo kuna jumla ya kozi 13 zilizogawanyika katika mada 4. hivyo mwanafunzi atapaswa kuchagua anayoitaka.

"Baada ya kuchagua kozi anayoitaka  na kulipia mwanafunzi atapewa tokeni ili  aweze kuona mafunzo hayo na mwisho wa siku atapewa mtihani wenye mfumo wa jibu sahihi au sio kweli," amesema Mapuli.

Amesema mradi huo ulianza mwaka 2016 ambapo mpaka sasa upo katika awamu ya pili ukiwa umebuniwa na Chuo Cha Veta kwa kushirikiana na Kampuni ya simu ya mkononi ya Airtel.

"Mpaka Sasa jumla ya watu elfu 43 wamefungua aplikesheni hii ya visomo na elfu 13 wamejisajili "alisema Mapuli

Ameongeza kuwa mfumo hautumii intaneti pale msomaji anapokuwa akisoma na upo katika mfumo wa lugha ya kiswahili na kingereza.